Londonda yashovchi fransiyalik Erik Troestler avtomobil jurnalida birinchi avlod Renault Twingo avtomobillari uchun o'tkaziladigan "Twing Raid" rallisi haqidagi maqolani o'qib qoldi. Garchi u hech qachon Twingo haydamagan bo'lsa-da, bu g'oya uni qiziqtirib qo'ydi. Taqdir taqozosi bilan, bir hafta o'tgach, uning Fransiyadagi do'sti olti yildan beri qarovsiz qolgan 1999-yilgi Renault Twingo avtomobilini tekinga sovg'a qildi. Bu haqda Autocar.co.uk xabar beradi.
Erik ushbu avtomobil bilan Ispaniyadan Marokashning Marrakesh shahrigacha davom etadigan 10 kunlik sarguzashtda qatnashishga qaror qildi. Rallida jami 450 ga yaqin Renault Twingo ishtirok etdi. Avtomobilni poyga sharoitlariga moslashtirish uchun Erikning akasi yordamga keldi. Ular dvigatelning ishonchliligi sababli 1149 kub santimetrli agregatga tegmaslikka qaror qilishdi.
Asosiy o'zgarishlar avtomobilning chidamliligini oshirishga qaratildi. Akasi old va orqa qismlarga himoya plitalarini o'rnatdi, osma tizimni (podveska) old tomondan 5 sm, orqa tomondan esa 6 sm ga ko'tardi. Shuningdek, 13 dyuymli g'ildiraklar yanada mustahkamroq 14 dyuymli shinalar bilan almashtirildi.
Salon ichida ham jiddiy o'zgarishlar amalga oshirildi. Orqa o'rindiqlar olib tashlanib, ularning o'rniga ikkita zaxira g'ildiragi, o't o'chirgichlar va zaruriy asbob-uskunalar joylashtirildi. Yukxona qavatining ostida esa Erik va uning hamrohi Adam White uchun uzoq yo'lda kerak bo'ladigan ehtiyot qismlar va ta'mirlash vositalari uchun maxsus joy hozirlandi.
“Zamin”ni Telegramʻda oʻqing!
