Avtomobil kompaniyalari ko'pincha asosiy faoliyatidan tashqariga chiqib, turli sohalarda o'z kuchini sinab ko'radi. Ba'zilar foydani ko'paytirishni maqsad qilsa, boshqalar iqtisodiy inqiroz davrida barqarorlikni saqlab qolish uchun shunday yo'l tutadi. Quyida mashhur brendlarning avtomobilsozlikdan tashqaridagi qiziqarli loyihalari bilan tanishamiz. Bu haqda Autocar.co.uk xabar beradi.
2012-yilda BMW kompaniyasi AQSh olimpiya terma jamoasi uchun bobsley chanasini ishlab chiqdi. Kompaniya o'zining uglerod tolali materiallar va aerodinamika bo'yicha tajribasidan foydalanib, yengil va tezkor chana yaratdi. Natijada, amerikalik sportchilar 2014-yilgi Sochi qishki Olimpiadasida 1952-yildan beri ilk bor shohsupaga ko'tarilishdi.
Fiat 1926-yilda Italiyaning mashhur "La Stampa" gazetasini sotib olgan. Gazeta kompaniya qo'l ostida mamlakatdagi eng yirik nashrlardan biriga aylandi. Hatto 1978-yilda Muammar Gaddafiyning bosimlariga qaramay, nashriyot o'z mustaqilligini saqlab qoldi. Fiat o'z ulushini 2017-yilga kelibgina sotib yubordi.
Genri Ford 1926-yilda Braziliya o'rmonlarida "Fordlândia" deb nomlangan butun boshli shaharchani barpo etdi. Uning maqsadi avtomobil ehtiyot qismlari uchun kauchuk yetishtirish edi. Biroq, loyiha muvaffaqiyatsizlikka uchradi va 1934-yilda Ford shaharchani tashlab ketishga majbur bo'ldi, chunki sintetik kauchuk ishlab chiqarish ancha samaraliroq bo'lib chiqdi.
2015-yilda BMW, Audi va Mercedes-Benz raqobatchi bo'lishlariga qaramay, Nokia kompaniyasiga tegishli HERE xaritalash xizmatini birgalikda sotib olishdi. Bu qadam avtomobil ishlab chiqaruvchilarga Apple yoki Google qoidalariga bog'lanib qolmasdan, kelajakdagi avtonom boshqariladigan avtomobillar uchun xaritalarni mustaqil rivojlantirish imkonini berdi.
“Zamin”ni Telegramʻda oʻqing!
