Rossiyaning «EM Rus» kompaniyasi Yandex bilan hamkorlikda yaratilgan UMO brendining ikkinchi modeli — UMO 8 krossoverini sertifikatsiyadan oʻtkazishni boshladi. Yangi avtomobil toʻliq uzatmali ketma-ket gibrid tizimiga ega boʻlib, undagi benzinli dvigatel faqatgina batareyani quvvatlantiruvchi generator vazifasini bajaradi. Modelning rasmiy taqdimoti shu yilning yoz oylarida oʻtkazilishi rejalashtirilgan. Bu haqda Ixbt.com xabar beradi.
«EM Rus» asoschisi Ilya Rashkinning soʻzlariga koʻra, UMO 8 ommaviy bozorga moʻljallangan «yirik mashina» boʻladi. Hozirda avtomobil uchun transport vositasi turini tasdiqlovchi (OTTS) hujjatlarni olish jarayoni ketmoqda. Ishlab chiqarish jarayoni esa poytaxtdagi «Moskvich» zavodida tashkil etiladi. Eslatib oʻtamiz, ushbu zavodda hozirda UMO 5 elektr krossoveri ham yigʻilmoqda.
Texnik maʼlumotlarga koʻra, UMO 8 modelining elektr dvigatellari quvvati 100–130 ot kuchiga teng (maksimal quvvat bundan ancha yuqori boʻladi), tortish batareyasi sigʻimi esa 75–124 A·soatni tashkil etadi. Mutaxassislarning fikricha, yangi model GAC S7, GAC S9 yoki Xpeng GX kabi yirik krossoverlar bazasida yaratilgan boʻlishi mumkin.
Yangi krossover Max va Ultra komplektatsiyalarida sotuvga chiqadi. Top-versiyada proyeksion displey, kengaytirilgan haydovchi yordamchilari tizimi va premium audio tizim oʻrnatiladi. Shuningdek, loyiha Yandex servislari bilan toʻliq integratsiya qilingan boʻlib, multimedia tizimida «Alisa» ovozli yordamchisi va 4G moduli mavjud boʻladi. Hozircha narxlar eʼlon qilinmagan boʻlsa-da, u UMO 5 modelidan qimmatroq boʻlishi aniq.
“Zamin”ni Telegramʻda oʻqing!
