Avtomobil texnologiyalari tarixida litiy-ionli akkumulyatorlar kabi tez rivojlangan boshqa bir yoʻnalishni topish qiyin. Bugungi kunda barcha elektromobillar ushbu texnologiyaning turli koʻrinishlaridan foydalanadi. 2013-yilda Tesla kompaniyasi Tesla Model S bilan bozorni oʻzgartirganida, uning batareyasi minglab kichik "18650" silindrsimon elementlardan iborat edi. Bu nom elementning oʻlchamlaridan (diametri 18 mm, uzunligi 65 mm) kelib chiqqan boʻlib, u oddiy maishiy batareyalarni eslatardi. Bu haqda Autocar.co.uk xabar beradi.
Biroq, akkumulyatorlarning boshqa formatlari ham mavjud boʻlib, ulardan biri pouch-elementlar (yassi paketli hujayralar) hisoblanadi. Qizigʻi shundaki, ilk Nissan Leaf modeli aynan shu turdagi elementlardan foydalangan va bu borada yangi Porsche Cayenne EV bilan oʻxshashlikka ega. 2010-yilda taqdim etilgan Nissan Leaf 24 kW/soat quvvatli batareyasi bilan 110-130 km masofa bosib oʻtgan boʻlsa, Porsche Cayenne EV 113 kW/soat quvvatli batareyasi bilan 600 km dan ortiq masofani zabt eta oladi.
Porsche oʻzining yuqori quvvatli batareyalarini Slovakiyaning Gorna Streda shahridagi Smart Battery Shop zavodida yigʻadi. Bu yerda Yevropada ishlab chiqarilgan elementlar modullarga joylashtiriladi. Jarayon oʻta toza sharoitda, komponentlarni elektrostatik razryaddan himoya qiluvchi qatʼiy standartlar asosida amalga oshiriladi. Pouch-elementlar bir-birining ustiga yuqori aniqlikda taxlanadi va ularning konnektorlari avtomatlashtirilgan lazerli payvandlash orqali ulanadi.
Batareya modullari barqarorlikni taʼminlash uchun maxsus koʻpik bilan toʻldiriladi va issiqlikni samarali tarqatish uchun elementlar orasiga issiqlik oʻtkazuvchi materiallar joylashtiriladi. Yakuniy bosqichda barcha modullar elektr va funksional sinovlardan oʻtkazilib, Porsche tahlil markazida chidamlilik va quvvatlanish qobiliyati boʻyicha tekshiriladi. Porsche har bir modulning maʼlumotlarini yozib boradi, bu esa koʻp yillardan keyin ham ularning holatini kuzatish imkonini beradi.
“Zamin”ni Telegramʻda oʻqing!
