Yurtimiz boks olamida iste’dodlar juda ko‘p. Jumladan, o‘smir va yoshlar toifasida deyarli barcha nufuzli musobaqalarda g‘alaba qozongan Jahongir Zokirov ham o‘zbek boksi kelajagi sifatida e’tirof etilmoqda. Og‘ir vazn toifasi vakili bo‘lgan, Zokirov kuni kecha o‘zi yakuniga yetgan kattalar o‘rtasidagi mamlakat chempionatida g‘alaba qozondi. Biz ushbu bokschimiz bilan bog‘lanib, qisqacha suhbatda bo‘ldik.
- Avvalo O‘zbekiston chempionatidagi g‘oliblik bilan tabriklayman. Ushbu musobaqa tashkilotchiligi, taassurotlari bilan o‘rtoqlashsangiz?
- Assalomu alaykum. Tabrik uchun rahmat! Nazarimda bu galgi chempionat avvalgilaridan sira qolishmaydigan tarzda, yuqori saviyada bo‘lib o‘tdi. Tashkilotchilik ham yaxshi bo‘ldi. Raqobat kuchli kechdi.
- Siz yaqindagina professional boksda ham debyut jangini o‘tkazdingiz. Baribir havaskor va profda uslub biroz boshchaqa bo‘ladi. Sizga bu qay darajada sezildi? Qiyinchilik tug‘dirmadimi moslashuv?
- To‘g‘ri, havaskor bilan professional boks anchagina farq qiladi. O‘ylaymanki, yaxshi moslashib oldim. Bu borada qiyinchilik sezmadim. Albatta, bunda murabbiylarimning yordami katta bo‘ldi.
- Amerikada tayyorgarlik davomida mashhur prof bokschilar, Jo Joys va Filip Xrgovich bilan sparringlar o‘tkazgansiz. Ulardan qanday tajribalar oldiz? Ularga qay darajada "qiynadim" deya olasiz?
- Albatta, tajribali bokschilar bilan sparringlar yaxshi o‘tdi. Ulardan ko‘p narsa o‘rgandim. Ayniqsa, Filipp Xrgovichdan o‘zimga kerakli bo‘lgan tajribani oldim. To‘g‘risi, ular mendan jiddiy qarshilikni kutmaganligini aytishdi. "Bu qanday boks, qaysi maktab?",- deya hayron qolishdi.
- Endi yana havaskor boksda davom etasizmi yoki profda ham janglar o‘tkazib turasizmi?
- Asosan e’tiborimni havaskor boksga qarataman. Biroq, professional yo‘nalishda ham reytingimni yaxshilab borish uchun, janglar taklif qilishsa, albatta rozi bo‘laman.
- Parij Olimpiadasida Bahodir Jalolov yo‘llanmani qo‘lga kiritdi. Undan keyingi Olimpiadada ishtirok etish niyatingiz bormi?
- Ha, 2024 yilda Bahodir Jalolov ishtirok etadi. Shubhasiz, 2028 yilgi Olimpiadaga yo‘llanma olib, ishtirok etaman, degan umiddaman.
“Zamin” yangiliklarini “Odnoklassniki”da kuzatib boring
