Dubay shahridda o‘tayotgan erkaklar o‘rtasidagi Jahon chempionati qizg‘in pallaga kirdi. Musobaqaning beshinchi kuni o‘zbekistonlik sportchilar uchun ayni ma’noda sinov va imkoniyatlarga boy bo‘ldi. Kun tartibida 4 nafar yurtdoshimiz ringga ko‘tarilishi rejalashtirilgan edi va ulardan biri — -86 kg vazn toifasida qatnashgan Akmaljon Isroilov muxlislarga haqiqiy master-klass namoyish qildi.
Isroilov qozog‘istonlik Daulet Tulemissovga qarshi to‘qnashuvda o‘ziga xos ustunlik bilan jangni boshidan oxirigacha nazorat qildi. Raqobatning o‘rtalaridanoq sportchimiz raqibini ikki marotaba nokdaunga yo‘llashga muvaffaq bo‘ldi. Bu holat jang dinamikasini tubdan o‘zgartirib, Isroilovning ustunligini yanada mustahkamladi.
Bellashuv yakunida hakamlar bir ovozdan — 5:0 hisobida g‘alabani o‘zbekistonlik bokschiga taqdim etdilar. Bu natija uni musobaqaning keyingi bosqichiga ishonchli ravishda olib chiqdi va yurtimiz delegatsiyasi uchun muhim qadam bo‘ldi.
Esga solib o‘tamiz, oldinda muxlislar kutgan yana bir qiziqarli duel bor — taniqli bokschimiz, Olimpiya chempioni Hasanboy Do‘smatov turkiyalik Samet Gumusga qarshi jang qiladi. Ushbu bahs ham jahon chempionati doirasidagi eng katta intrigalardan biri hisoblanadi.
Dubaydagi har bir kun, har bir jang bizning sportchilar uchun yangi imkoniyat, yangi tarix. Muxlislar esa navbatdagi quvonchli yangiliklarni sabrsizlik bilan kutmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
