«Liverpul» yozgi transfer oynasida tarkibni kuchaytirishni rejalashtirmoqda va «Nyukasl» hujumchisi Entoni Gordonni asosiy maqsad sifatida belgilagan. Sobiq hujumchi Maykl Ouenning fikricha, Gordon «Enfild» uchun juda foydali sarmoya bo'lishi mumkin. Angliya terma jamoasi a'zosi bo'lgan futbolchi avvalroq «Everton» safida to'p surgan bo'lsa-da, bolaligidan «Liverpul» muxlisi hisoblanadi. Bu haqda Goal.com xabar beradi.
Klub hujum chizig'ida jiddiy muammolarga duch kelmoqda. Jamoa yetakchisi Muhammad Salah 2025-26 yilgi mavsum yakunida shartnomasi tugagach, klubni tark etishi kutilmoqda. Shuningdek, fransiyalik hujumchi Ugo Ekitike Axill payining uzilishi sababli kamida to'qqiz oyga safdan chiqdi. Bu holat mersisaydliklarni tezkor choralar ko'rishga undamoqda.
Maykl Ouen Gordonning universal futbolchi ekanligini alohida ta'kidladi. Uning so'zlariga ko'ra, Salahning o'rnini bosish uchun o'ng qanot hujumchisini sotib olish ustuvor vazifa bo'lishi kerak. Gordon esa ham qanotlarda, ham markazda samarali o'yin ko'rsata oladi. Ouen futbolchini «ajoyib o'yinchi» deb atadi va u joriy yilgi Jahon chempionatida muhim rol o'ynashiga ishonch bildirdi.
«Nyukasl» o'z yulduzini osonlikcha qo'yib yubormoqchi emas. Gordonning «Sent-Jeyms Park»dagi shartnomasi 2030 yilgacha amal qiladi, shu sababli klub 75 million funt sterling miqdorida tovon puli talab qilishi mumkin. «Liverpul» Chempionlar ligasiga yo'llanma olish orqali futbolchini o'z safiga chorlashni maqsad qilgan.
“Zamin”ni Telegramʻda oʻqing! 
