Ispaniya futboli olamida kutilmagan xabar tarqaldi: Barselona sobiq prezidenti Josep Bartomeu Vinicius Junior faoliyati boshida kataloniyaliklar safiga o‘tishiga juda yaqin bo‘lganini ma’lum qildi. Bartomeu ESPN Deportes nashriga bergan intervyusida tomonlar o‘rtasida dastlabki kelishuvga erishilganini tasdiqladi. Bu haqda Goal.com xabar beradi.
"Biz Vinicius Junior bilan muzokaralarni ancha oldinga surgan edik. Uning oilasi va agentlari bilan gaplashdik, hatto dastlabki kelishuv ham bor edi. Biroq, Real Madrid bizdan ko‘ra yaxshiroq taklif bilan chiqdi va futbolchini o‘z safiga qo‘shib oldi", — deydi Bartomeu.
Real Madrid 2017-yilning may oyida braziliyalik iqtidor egasi uchun 45 million yevro to‘laganini e’lon qilgan edi. Vinicius 18 yoshga to‘lganidan so‘ng, ya’ni 2018-yilning iyul oyida rasman Madrid klubi futbolchisiga aylandi. O‘tgan davr mobaynida u dunyoning eng kuchli hujumchilaridan biriga aylanishga muvaffaq bo‘ldi.
Vinicius Junior Madrid klubi safida 372 ta o‘yinda maydonga tushib, 127 ta gol urdi va 100 ta golli uzatmani amalga oshirdi. Ayni damda Real Madrid ichki muammolar va jamoa ichidagi kelishmovchiliklar haqidagi mish-mishlar bilan kurashmoqda, biroq Antonio Rüdiger bilan bog‘liq ayrim xabarlar o‘z tasdig‘ini topmadi.
“Zamin”ni Telegramʻda oʻqing!
