Moskva shahrida robot-kuryerlar xizmati kengayib, ayni damda poytaxtning 20 ta tumanida faoliyat yuritmoqda. Moskva meri o‘rinbosari Maksim Liksutovning ma’lum qilishicha, robotlar yordamida buyurtmani yetkazib berishning o‘rtacha vaqti atigi 15 daqiqani tashkil etadi. Bu haqda Ixbt.com xabar beradi.
Robotlashtirilgan yetkazib berish tizimi jadal rivojlanmoqda va hozirda har kuni 1,5 mingdan ortiq buyurtma aynan robotlar orqali mijozlarga yetkazib berilmoqda. Ushbu texnologiya Fili-Davydkovo, Aeroport, Savelovskiy, Tverskoy, Meshchanskiy, Krasnoselskiy, Maryina Roshcha, Perovo, Danilovskiy, Donskoy, Presnenskiy, Yakimanka, Zamoskvoreche, Xamovniki, Arbat, Ramenki, Ochakovo-Matveyevskoye, Troparevo-Nikulino, Prospekt Vernadskogo va Lomonosovskiy tumanlarida ishlamoqda.
Moskvaliklarning robot-kuryerlarga bo‘lgan qiziqishi yildan-yilga ortib bormoqda, bu esa xizmat ko‘lamining yanada kengayishiga turtki bo‘lmoqda. Foydalanuvchilar buyurtmalarni Yandex Eda yoki Yandex Lavka ilovalari orqali amalga oshirishlari mumkin.
Buyurtma tasdiqlangandan so‘ng, mijozlar ilova orqali robotning harakatlanish yo‘nalishini xaritada real vaqt rejimida kuzatib borish imkoniyatiga ega. Mazkur texnologik yechim shahar logistikasini optimallashtirishda muhim ahamiyat kasb etmoqda.
“Zamin”ni Telegramʻda oʻqing!
