Google I/O konferensiyasida kompaniya internetdagi barcha xaridlarni yagona markazda boshqarish imkonini beruvchi Universal Cart tizimini e’lon qildi. Ushbu yangilik sun’iy intellekt yordamchilari shunchaki tavsiya beruvchi vositalardan elektron tijoratning faol ishtirokchilariga aylanishini anglatadi. Foydalanuvchilar endilikda Google Search, Gemini, YouTube yoki Gmail orqali mahsulotlarni yagona savatga qo‘shishlari mumkin. Bu haqda Techcrunch.com xabar beradi.
Universal Cart tizimi narxlar o‘zgarishini kuzatib boradi, chegirmalar haqida xabar beradi va mahsulotlar zaxirasi tugaganda foydalanuvchini ogohlantiradi. Shuningdek, tizim AI yordamida xaridorlarga to‘g‘ri qaror qabul qilishda yordam beradi. Masalan, kompyuter qismlarini yig‘ishda mos kelmaydigan detallar haqida ogohlantirib, muqobil variantlarni taklif qiladi.
Kompaniya, shuningdek, Agent Payments Protocol (AP2) yangilanishini taqdim etdi. Bu texnologiya foydalanuvchilarga sun’iy intellekt agentlariga belgilangan limitlar doirasida o‘z nomidan to‘lovlarni amalga oshirishga ruxsat berish imkonini beradi. Foydalanuvchilar xarid qilinadigan brendlar va sarf-xarajatlar chegarasini oldindan belgilab qo‘yishlari mumkin.
Universal Commerce Protocol (UCP) orqali xaridorlar to‘g‘ridan-to‘g‘ri Google orqali yoki savdogar saytiga o‘tib xaridni yakunlashlari mumkin. Hozirda ushbu funksiya AQShda ishga tushirilgan bo‘lib, yoz oylarida Gemini ilovasiga, keyinchalik esa YouTube va Gmail platformalariga ham integratsiya qilinadi. Kelgusida xizmat qamrovi Kanada, Avstraliya va Buyuk Britaniyagacha kengaytirilishi rejalashtirilgan.
“Zamin”ni Telegramʻda oʻqing!
