Ugreen kompaniyasi oʻziga xos dizayn va oʻrnatilgan displeyga ega boʻlgan yangi Ugreen 45W USB-C GaN Fast Charger quvvatlash qurilmasini namoyish etdi. Yangi gadjet 119 yuan (taxminan 18 dollar) etib narxlandi va uning savdolari 26-maydan boshlanishi rejalashtirilgan. Bu haqda Ixbt.com xabar beradi.
Qurilmaning asosiy oʻziga xosligi uning old panelidagi kichik displeydir. U real vaqt rejimida quvvatlash quvvati, kuchlanish, tok kuchi, harorat va foydalanilayotgan quvvat uzatish protokoli haqidagi maʼlumotlarni aks ettiradi. Eng qiziqarli jihati shundaki, adapter Apple qurilmalarini taniy oladi va ekranda iPhone modelining nomini chiqaradi.
Shuningdek, foydalanuvchilar displeyda turli emojilarni ham oʻrnatishlari mumkin. Qurilma korpusi kumush rangda boʻlib, asosi qizil rangda ishlangan. Ixchamlikni taʼminlash uchun uning vilkasi yigʻiluvchan qilib tayyorlangan. Maʼlumotlarni oʻqish qulay boʻlishi uchun ekran 45 daraja burchak ostida joylashtirilgan.
GaN texnologiyasi tufayli adapter 45 W quvvatga ega boʻlishiga qaramay, juda ixcham oʻlchamda qolgan. U 20 V va 2,25 A gacha boʻlgan rejimlarni hamda 100–240 V kirish kuchlanishini qoʻllab-quvvatlaydi. Qurilmaning vazni 96 gramm boʻlib, ishlab chiqaruvchi unga 18 oylik kafolat taqdim etmoqda.
“Zamin”ni Telegramʻda oʻqing!
