Ўзбекистон Президенти Шавкат Мирзиёев “Марказий Осиё — Европа Иттифоқи” биринчи саммитида нутқ сўзлаб, минтақа хавфсизлиги ва Афғонистон билан ҳамкорлик масалаларига алоҳида тўхталиб ўтди, деб president.uz хабар берди.
Унинг таъкидлашича, умумий таҳдидлар — терроризм, экстремизм, радикализм, кибержиноятчилик, наркотрафик ва ноқонуний миграцияга қарши курашишда ҳамкорлик тобора долзарб бўлиб бормоқда.
Президент Европа Иттифоқининг терроризмга қарши курашиш юзасидан мулоқот бошлаш ташаббусини қўллаб-қувватлашини билдирди.
Шу билан бирга, BOMCA ва CADAP дастурлари доирасида амалий ҳамкорликни кенгайтириш муҳимлиги қайд этилди.
Афғонистон масаласига тўхталар экан, Мирзиёев Ўзбекистон ушбу мамлакатда тинч тараққиётни таъминлаш юзасидан сиёсий маслаҳатлашувларга тайёр эканини билдирди.
“Жаҳон ҳамжамияти Афғонистондан келаётган таҳдидларни етарлича баҳолай олмаяпти. Бу мамлакатни минтақавий иқтисодий жараёнларга жалб этиш, инвестиция ва инфратузилма лойиҳаларини амалга ошириш орқали ижтимоий соҳани тиклаш зарур”, деди у.
Шунингдек, у халқаро ҳамжамиятни амалдаги афғон ҳукумати билан конструктив мулоқот ўрнатишга чақирди.
Саммит якунида, “Марказий Осиё – Европа Иттифоқи” форматида ҳар йили Бош вазир ўринбосарлари даражасида Шериклик қўмитаси йиғилишларини ўтказиш таклиф қилинди.
Президент илгари сурилган ташаббуслар ва келишувларни амалга ошириш учун “Йўл харитаси”ни тайёрлаш таклифини ҳам билдириб ўтди. “Замин” янгиликларини “Telegram”да кузатиб боринг
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
