Green Card–2025 натижалари эълон қилинди: 5,5 мингдан зиёд ўзбекистонлик АҚШга йўл олади

Америка Қўшма Штатлари ҳукумати томонидан ҳар йили анъанавий тарзда ўтказиладиган “Турли миллатга мансуб иммигрантлар визаси” лотереяси, яъни Green Card дастурининг 2025 йил учун натижалари маълум қилинди. Бу ҳақда АҚШнинг Кентукки штатининг Уильямсбург шаҳрида жойлашган Кентукки консуллик маркази расман хабар берди.

Ушбу машҳур дастур доирасида дунё бўйлаб ҳар йили 55 минг нафар шахсга АҚШда доимий яшаш имконияти тақдим этилади. Жорий йилда ушбу лотерея ютуғининг 5,5 мингдан ортиқ қисми ўзбекистонликларга насиб қилди. Бу кўрсаткич Ўзбекистон фуқароларининг ушбу дастурга бўлган катта қизиқиши ва иштироки юқори эканлигини яна бир бор тасдиқлайди.

DV-2025 дастури Америка Қўшма Штатларининг Иммиграция ва фуқаролик тўғрисидаги қонунининг 203(c) бўлимига асосан ташкил этилиб, ушбу қонундаги талабларга кўра, АҚШга иммиграция даражаси нисбатан паст бўлган давлатлар фуқароларига ҳар йили 55 000 тагача доимий яшаш визалари берилади.

2025 йил учун эълон қилинган натижаларга кўра, жами 131 минг нафарга яқин ариза топширган шахслар дастлабки рўйхатга олинган ва уларнинг ҳар бирига ушбу янгилик бўйича хабар берилган. Бу эса, дастлаб танланган 55 минг нафар иштирокчининг барчаси ҳам кейинги жараёнларда қатнашишга қарор қилмаслиги мумкинлиги сабабли, қўшимча эҳтиёт чоралари сифатида амалга оширилган. Шундай қилиб, 2025 йилги молиявий йил давомида DV-2025 учун ажратилган барча визалар тўлиқ тақсимланиши кўзда тутилган.

Таъкидлаш жоизки, бу йилги натижаларни эълон қилиш жараёнида техник хатолик туфайли Ўзбекистон Европа минтақаси мамлакатлари қаторида қайд этилган. Агар Ўзбекистон Осиё минтақасидаги мамлакатлар билан солиштирилганда, мамлакатимиз ушбу минтақа бўйича биринчи ўринни эгаллаган бўлар эди. Ўзбекистондан кейинги энг кўп ютуқни Эрон ва Афғонистон давлатлари фуқаролари қўлга киритган.

Green Card лотереяси ўзбекистонликлар учун АҚШда қонуний яшаш ва ишлаш имкониятини берувчи муҳим дастур ҳисобланади. Ҳар йили минглаб ватандошларимиз ушбу имкониятдан фойдаланиб, океанорти мамлакатда ўз келажакларини барпо қилиш учун муҳим қадам қўйишади.

Zamin.uz таҳририяти мазкур дастурда ғолиб бўлган ватандошларимизни табриклайди ва уларга келгуси ҳаётларида улкан зафарлар тилайди!

Янгиликлар