2025 йилнинг 1 январидан бошлаб Ўзбекистон ҳудудида турар ва нотурар биноларни ижарага берадиган жисмоний ҳамда юридик шахслар учун энг кам ижара тўлови меъёри аниқ белгиланди. Бу тартиб 2025 йил учун тасдиқланган давлат бюджети ҳақидаги қонунда ўз аксини топган.
Ҳукумат томонидан жорий этилган мазкур қоидалар, амалдаги солиқ юкламаларини шаффофлаштириш, расмий ижара муносабатларини кучайтириш ва давлат даромадларини тўғри шакллантириш мақсадини кўзда тутади. Эндиликда ҳам тадбиркорлар, ҳам оддий фуқаролар ушбу белгиланган энг кам ставкаларга амал қилган ҳолда ижара шартномаларини расмийлаштириши талаб этилади.
Жумладан, жойлашув ҳудудига қараб, турар жойларни ижарага бериш бўйича 1 квадрат метр учун ойлик энг кам ижара ставкаси қуйидагича белгиланди:
• Тошкент шаҳрида — 28 000 сўм;
• Нукус шаҳри ҳамда барча вилоят марказларида — 13 500 сўм;
• Қолган барча аҳоли яшаш пунктида — 5 500 сўм.
Шунингдек, нотурар (яъни ишлаб чиқариш, тижорат ёки хизмат кўрсатиш мақсадида фойдаланиладиган) жойларни ижарага бериш бўйича ойлик минимал ставка ҳам белгиланди:
• Тошкент шаҳрида — 45 000 сўм;
• Нукус шаҳри ва барча вилоят марказларида — 26 500 сўм;
• Қолган ҳудудларда — 11 000 сўм.
Мазкур тартиблар нафақат ижара муносабатларида шаффофликни таъминлайди, балки давлат бюджетининг барқарор тушум манбаини таъминлашга хизмат қилади. Шунингдек, ижарачилар ва мулк эгалари ўртасидаги ҳуқуқий муносабатларни мустаҳкамлашда ҳам муҳим роль ўйнайди.
Экспертлар фикрига кўра, ушбу ставка ҳудудлар бўйича ижара бозоридаги ҳақиқий иқтисодий шароитлардан келиб чиққан ҳолда белгиланган бўлиб, жойлашув, талаб ва инфратузилма даражаси инобатга олинган.
Шу муносабат билан, барча ижара берувчи жисмоний ва юридик шахслар, 2025 йилдан бошлаб ўз фаолиятини ушбу белгиланган энг кам ставкадан кам бўлмаган миқдорда расмийлаштириши шарт бўлади.
«Замин»ни Telegram’да ўқинг!
