Президент Шавкат Мирзиёев 28 август куни мамлакатимизда амалий ташриф билан бўлиб турган АҚШ президентининг глобал шерикликлар бўйича махсус вакили Паоло Замполли билан учрашди.
Учрашувда Ўзбекистон билан АҚШ ўртасидаги стратегик шериклик ва кўп қиррали ҳамкорлик муносабатларини янада кенгайтириш масалалари атрофлича кўриб чиқилди.
Турли даражаларда самарали алоқалар давом этаётгани алоҳида мамнуният билан қайд этилди. Хавфсизлик соҳасида, терроризм, экстремизм ва ноқонуний миграцияга қарши курашиш борасида самарали ҳамкорлик йўлга қўйилган.
АҚШ анъанавий равишда Ўзбекистоннинг муҳим иқтисодий ҳамкори ҳисобланади. 2024 йилда товар айирбошлаш ҳажми 15 фоизга кўпайди. Лойиҳалар портфели 11 миллиард доллардан ошган.
Жорий йил июнь ойида ўтказилган Тошкент инвестиция форумида АҚШнинг 100 дан ортиқ етакчи компаниялари иштирок этди.
Минерал ресурслар, авиация, электротехника, қишлоқ хўжалиги, рақамли технологиялар, молия, инновациялар, таълим ва бошқа устувор йўналишларда кооперация лойиҳаларини илгари суриш учун катта салоҳият мавжудлиги қайд этилди.
«С5+1» формати доирасида минтақавий ҳамкорликни ривожлантириш муҳим экани таъкидланди.
Бўлажак мулоқотлар ва қўшма тадбирлар режаси ҳам кўриб чиқилди.
«Замин»ни Telegram’да ўқинг!
