Кувайтнинг Dejavu for Juice компанияси раҳбари Аҳмад ал-Бағилий Хоразм вилоятида ўтказилган бизнес-форум ҳамда «Қовун сайли» халқаро фестивалида иштирок этди. Ушбу ташриф доирасида меҳмон маҳаллий ишбилармонлар билан мулоқот қилиб, ҳамкорликнинг амалий йўналишларини муҳокама этди.
Кувайт вакили «Қовун сайли» фестивали ҳақида тўхталар экан, кўплаб халқаро тадбирларда қатнашганини, бироқ айнан кўҳна Хоразм заминида ташкил этилган ушбу фестиваль ўзига хос жозибадорлик ва руҳ билан ажралиб туражагини таъкидлади. Унинг қайд этишича, маданий анъана, маҳаллий пазандачилик ва меҳмондўстлик уйғунлиги тадбирни ноёб қилади.
Бизнес-форум доирасида кувайтлик тадбиркор ўзбек ишбилармон доиралари билан B2B форматда учрашувлар ўтказди. Суҳбатларда ўзаро ҳамкорликнинг истиқболли йўналишлари — қайта ишланган озиқ-овқат, ичимликлар саноати, савдо тармоқлари ва логистика бўйича таклифлар алмашилди. Сафар чоғида, шунингдек, Хоразмдаги Japan Uz Trade House ва Khorezm Insulation Group компаниялари вакиллари билан ҳам алоҳида музокаралар ташкил этилди.
Учрашувлар мазмунида, аввало, Ўзбекистондан қуруқ ва қуритилган меваларни Кувайтга экспорт қилиш масаласи атрофлича кўриб чиқилди. Томонлар қулай транспорт-логистика йўналишларини белгилаш, етказиб бериш муддатлари ва сифат стандартларини мувофиқлаштириш, сертификатлаш ва божхона расмиятларини оптималлаштириш бўйича ишчи гуруҳлар тузиш ташаббусини муҳокама қилди.
Қисқаси, Хоразмдаги бизнес-форум ва «Қовун сайли» халқаро фестивали Кувайт билан савдо-иқтисодий алоқаларни янги босқичга олиб чиқиш учун қулай минбар бўлди: эҳтиёж ва таклифлар аниқланди, ҳамкорликнинг амалий қадамлари белгиланди, экспорт логистикаси бўйича дастлабки келишувлар муҳокама этилди. Энди эса навбат — келишувларни аниқ лойиҳаларга айлантириш ва қўшма ташаббусларни амалга оширишга.
Фото: Дунё
«Замин»ни Telegram’да ўқинг!
