Тошкент шаҳрида аттестация жараёнларидан норози бўлган бир гуруҳ ўқитувчиларнинг суд иши якунланди. Улар Мактабгача ва мактаб таълими вазирлигига қарши даъво аризаси билан мурожаат қилиб, аттестация имтиҳонларини қайта ташкил этиш ва маънавий зиён учун тўлов тайинлашни талаб қилган эдилар. Бироқ суд уларнинг талабини асоссиз деб топиб, вазирлик фойдасига қарор чиқарди.
Маълумотларга кўра, 8 сентябрь куни бўлиб ўтган суд мажлисида асосан она тили ва адабиёт фанидан дарс берадиган педагоглар иштирок этди. Суд жараёнида уларнинг адвокатлари ҳам иштирок этиб, даъвогарлар манфаатини ҳимоя қилди. Суд мажлиси судья Гули Шукурлаева раислигида тўрт марта муҳокама қилинди.
Ўқитувчиларнинг вакиллари аттестация жараёнларида қатор камчиликлар бўлганини таъкидлашди. Жумладан, улар тест саволлари халқаро талабларга тўлиқ жавоб бермаганини, саволлар апробациядан ўтказилмаганини ва натижаларда холислик таъминланмаганини билдирди. Шунингдек, баҳолаш жараёнлари шаффоф ўтмагани ҳақида далиллар келтиришди.
Бироқ вазирлик юристлари барча айбловларни рад этди. Уларга кўра, тест материаллари халқаро стандартлар асосида ишлаб чиқилган, апробациядан ўтган ва тизим халқаро ташкилотлардан бири томонидан аккредитация қилинган. Шунинг учун натижалар қонуний ва адолатли ҳисобланади.
Суд жараёни давомида даъвогар томони янги экспертлар тайинлаб, саволлар сифати ва баҳолаш жараёнини қайта кўриб чиқиш ҳақида илтимоснома берди. Бироқ бу талаб ҳам суд томонидан рад этилди. Натижада педагогларнинг аттестацияни қайта ўтказиш ҳамда маънавий зарарни қоплаш тўғрисидаги талаби қондирилмади.
Суд қарорига кўра, ўқитувчиларнинг барча даъвоси асосли далиллар билан тасдиқланмагани учун рад этилган. Бироқ суд мажлисида уларга қарордан норози бўлсалар, юқори инстанцияга апелляция бериш ҳуқуқи борлиги эслатиб ўтилди.
Эслатиб ўтамиз, жорий йилда 190 мингга яқин педагог аттестация жараёнларида иштирок этди. Улардан қарийб 59 фоизи имтиҳондан ўта олмади. Бу кўрсаткич жамоатчилик орасида кенг муҳокамага сабаб бўлди. Ижтимоий тармоқларда саволларнинг мазмуни, баҳолаш мезонлари ва шаффофлик масалалари бўйича кўплаб норозиликлар билдирилди.
Айнан шу норозиликлар натижасида бир гуруҳ педагоглар вазирликка қарши судга мурожаат қилишди. Улар ўзларининг ҳуқуқлари бузилганини ва аттестация жараёнида адолат таъминланмаганини иддао қилишди. Бироқ суд органлари вазирлик томонини қўллаб-қувватлади.
«Замин»ни Telegram’да ўқинг!
