Сўнгги саккиз йил ичида мамлакатимизда таълим ва илм-фан соҳаларига қаратилган маблағлар кескин ошгани маълум қилинди. Хусусан, бу муддатда ажратилган сармоя 6 баробар кўпайиб, 378 триллион сўмга етди.
Шу билан бирга, Ўзбекистон тарихида илк бор олтин-валюта захиралари 50 миллиард доллардан ошиб, янги маррани забт этди. Президент таъкидлаганидек, бу барқарор иқтисодий ўсишдан ва етарли ресурслардан дарак беради.
— Иқтисодиётимиз изчил ривожланмоқда, имконият ва захираларимиз етарлича. Бу — боғча ва мактаблардан тортиб техникум ҳамда олий таълим муассасалари қурилиши, уларни замонавий жиҳозлар билан таъминлаш, устоз ва мураббийларнинг моддий рағбатини узлуксиз ошириб боришнинг ишончли кафолати эмасми?! — деди Президент.
Унинг сўзларига кўра, таълим сифатини юксалтириш, ўқитувчиларнинг меҳнат ва турмуш шароитларини яхшилаш мамлакат ислоҳотларининг энг муҳим йўналишларидан бири бўлиб қолади.
Президент алоҳида таъкидлади: Янги Ўзбекистонда энг қадрли соҳалардан бири — таълим, энг ҳурматга сазовор шахслар эса — ўқитувчи ва мураббийлардир.
Шу тариқа, таълим ва фанга йўналтирилаётган катта сармоялар юртимизда келажак авлод тарбияси ва билим соҳаси учун мустаҳкам пойдевор яратишга хизмат қилмоқда.
«Замин»ни Telegram’да ўқинг!
