22 сентябрь куни БМТ Бош ассамблеяси 80-юбилей сессияси доирасида АҚШ президентининг Жанубий ва Марказий Осиё бўйича махсус вакили Сержио Гор Ўзбекистон президенти Шавкат Мирзиёев билан учрашувидан сўнг, тадбирни ёритиш учун Ню-Йоркда бўлиб турган ўзбекистонлик журналистларга ўзининг фикрлари билан ўртоқлашди.
Журналистлардан бири унинг Доналд Трампнинг Ўзбекистонга бўлган кутилмаларини ва Шавкат Мирзиёев билан ўтган учрашув ҳақида савол берди. Сержио Горнинг сўзларига кўра, АҚШ президенти Доналд Трамп Ўзбекистон раҳбарига бўлган ҳурматини изҳор этган ва унинг президентлигига катта ишонч билдирган.
“Айтмоқчиманки, президент сизнинг президентингиз билан шу ой бошида гаплашганди. У ўзининг самимий саломини етказишимни сўради. У сизнинг президентингизни жуда ҳурмат қилади”, - деб айтган Гор.
Унинг таъкидлашича, АҚШ ва Ўзбекистон орасидаги ҳамкорлик ҳақидаги натижалар, хусусан, АҚШнинг энг йирик компанияларининг Ўзбекистон билан имзолаган битимлари, ҳар икки мамлакатнинг ҳамкорликка бўлган тайёрлигини кўрсатади. Бу, ўз навбатида, юқори даражадаги ҳамкорликни ривожлантиришга интилишни билдирган.
Гор шунингдек, Шавкат Мирзиёев билан ўтказилган учрашувда кўплаб муҳим мавзулар муҳокама қилинганини айтди. “Муносабатларни, ҳамкорликни кучайтириш, бизнес ва хавфсизлик масалалари. Биз кўп масалаларни муҳокама қилдик. Сизнинг ажойиб президентингиз Оқ уйда илиқ кутиб олинди”, - деб қўшди у.
Президентлар ўртасидаги ушбу мулоқот икки давлат ўртасидаги алоқаларни янада мустаҳкамлашга қаратилган муҳим қадам бўлди. Горнинг сўзларига кўра, АҚШ президенти Мирзиёев билан янада кенгайтирилган ҳамкорликни кутмоқда ва бунинг натижасида икки мамлакат ўртасидаги стратегик шериклик янада мустаҳкамланади.
«Замин»ни Telegram’да ўқинг!
