17:32 / 24.09.2025

Доналд Трамп: Ўзбекистон президенти билан кўришиш мен учун катта шараф, у зот жуда ҳурматли инсон

23 сентябр БМТ қароргоҳида Ўзбекистон президенти Шавкат Мирзиёев АҚШ президенти Доналд Трамп билан учрашди. Қисқа суҳбатда Трамп Ўзбекистон ва АҚШ компаниялар ўртасидаги имзоланган 105 миллиард долларлик келишувларни мақтади. Президент Шавкат Мирзиёев эса Трампнинг тинчлик бўйича Нобел мукофотига муносиб эканини айтди ҳамда Самарқандга таклиф қилди. Kun.uz суҳбатнинг ўзбек тилидаги тўлиқ таржимасини келтирмоқда.

АҚШ президенти Доналд Трамп: Хўш, катта раҳмат. Ўзбекистон президенти билан бирга бўлиш мен учун катта шараф. У зот жуда ҳурматли инсон. У Ўзбекистонда узоқ вақтдан бери, кўп йиллардан буён фаолият юритади, тўғрими? Тахминан 15 ёки 16 йилча. Бу узоқ муддат. Бир мамлакатда бунча узоқ вақт фаолият юритишнинг сабаби — бу сизнинг жуда ақлли ва муносиб эканингиздир. Шу боис, биз билан бирга эканингиз учун сизга миннатдорчилик билдирмоқчиман. Биласизми, у турли Америка маҳсулотларининг йирик харидини амалга оширди. Уларнинг пули кўп. Уларда нефт ва пул мўл-кўл. Нефт одатда пул билан ёнма-ён юради. Лекин улар мамлакат сифатида жуда яхши натижаларга эришди ва у ҳақиқатан ҳам яхши етакчи бўлди. Сиз билан яна бирга бўлиш мен учун шараф. Катта раҳмат.

Президент Шавкат Мирзиёев: Раҳмат. Авваламбор, айтаётган гапларингиз ва қилаётган ишларингиз учун катта раҳмат, жаноб президент. Бугун учрашамиз дегандингиз — мана, учрашиб турибмиз. Бунинг учун сиздан жуда миннатдорман. Бугун эрталаб Бирлашган Миллатлар Ташкилоти сессиясидаги чуқур маъноли маърузангиз билан сизни табриклайман. Бу шунчаки ақл бовар қилмас бўлди, сиз барча масалаларга аниқлик киритдингиз.

Албатта, сиз билан телефон суҳбати чоғида келишиб олганларимизнинг барчасини бажаряпсиз. Ана ўша еттита можарога барҳам берганингиз билан сизни яна бир бор табрикламоқчиман. Айниқса, бизнинг минтақамиз учун энг асосийси — Озарбойжон ва Арманистон ўртасидаги можарога ечим топдингиз.

Яна бир бор такрорлайман: сиз ҳаммадан кўра кўпроқ Нобел мукофотига муносибсиз. Биз буни айтганмиз ва айтишда давом этамиз. Шундай экан, биз келишиб олган барча масалалар бажарилмоқда ва бажарилади. Мен мулоқотимизни бундан кейин ҳам давом эттиришимизни истардим. Биз биргаликда олға сурадиган шундай дастур тузганингиз учун сизга катта раҳмат. Бунинг учун сиздан миннатдорман.

Фото: Ўзбекистон президенти матбуот хизмати

Доналд Трамп: Хўш, катта раҳмат. Биласизми, президент тахминан беш дақиқадан сўнг нутқ сўзлайди. У ўша ерда бўлиши керак ва мен уни томоша қилмоқчиман. Шунинг учун, агар хоҳласангиз, қисқагина савол-жавоб қилишимиз мумкин ва буни тез ўтказамиз. Аммо сиз билан бирга бўлиш мен учун катта шараф бўлди. Энди эса бориб ажойиб нутқ сўзлашингизни истайман.

АҚШ ОАВларидан бирининг мухбири Трампга савол бермоқда: Жаноб президент, сизга суиқасд қилмоқчи бўлган Раян Рут ҳозиргина айбдор деб топилди. Бунга муносабатингиз қандай?

Доналд Трамп: Мен кўрсатилган адолат учун ҳамда Пем Бонди, Тодд Бланш ва бошқалар, уларнинг жамоаси ишни қандай олиб боргани учун жуда миннатдорман. Бу ҳақиқатан ҳам яхши олиб борилди ва бу жуда муҳим. Бундай нарсаларга йўл қўйиб бўлмайди. Бунинг президентга ёки ҳатто оддий одамга ҳам бундай бўлишига йўл қўйиб бўлмайди. Шундай қилиб, адолат қарор топди ва нима бўлишини кўрамиз. Лекин мен бу борада судя, ҳакамлар ҳайъати ва барча иштирокчиларга миннатдорчилик билдираман. Бу жуда профессионал тарзда амалга оширилди ва бу катта шараф. Катта шараф.

АҚШнинг яна ОАВларидан бирининг мухбири Трампга савол берди: Жаноб президент, Ғазо бўйича урушдан кейинги режани муҳокама қилиш учун бугун тушдан кейин мусулмон ва араб етакчилари билан бўладиган учрашувингиз ҳақида бироз айтиб бера оласизми?

Доналд Трамп: Бу катта учрашув бўлади. Бу жуда муҳим учрашув. Лекин ҳозир мен учун ҳам муҳим учрашув бўляпти, чунки у бизнинг миллиардлаб долларлик ускуналаримизни сотиб олди. Биз эса дунёдаги энг яхши ускуналарни ишлаб чиқарамиз. Шундай экан, биз у ускуналар сиз учун мукаммал бўлишини таъминлаймиз.

АҚШ ОАВларидан бирининг мухбири Трампга савол бермоқда: Жаноб президент, Ўзбекистон билан яна қўшимча битимлар имзоланадими?

Доналд Трамп: Ҳа, шундай. Биз бир-иккита жуда йирик битим ҳақида гаплашяпмиз. У бугун, сўнгги бир неча кун ичида аллақачон бир нечта йирик битимларни амалга оширди. Лекин бизнинг муносабатларимиз яхши бўлган ва у билан аввал ҳам учрашганмиз. Муносабатларимиз ҳақиқатан ҳам ажойиб. У жуда обрўли инсон ва етакчи.

Шавкат Мирзиёев: Мана қаранг. Агар 2018-2024 йилларда [Ўзбекистон ва АҚШ ўртасидаги савдо] 19 миллиард доллар бўлган бўлса, 2025-2035 йилларда 105 миллиард доллар бўлади.

Доналд Трамп: 105 миллиард доллар. Бу ёмон эмас! Беш дақиқалик учрашувга арзийди, тўғрими? Фикримга қўшиласизми?

Қаранг, қаранг, бу ажойиб — тракторлар, ҳар хил маҳсулотлар, жами 105 миллиард доллар. Хўш, 2018-2024 йил ичида 19,4 миллиард долларлик, энди эса [Ўзбекистон] 105 миллиард долларлик харидларни амалга оширмоқда. Биласизми, мен у билан учрашганимда бундан камроқ деб ўйлагандим. Бир миллиарддан ошган ҳар қандай сумма... Шундай экан, агар 105 миллиардга етса, у билан 15 ёки 20 марта учрашаман [ҳазил оҳангида – таҳр.] Сиз боринг-да, ўзингизнинг ажойиб нутқингизни сўзланг.

Шавкат Мирзиёев: Раҳмат катта. Барибир мен сизни Ўзбекистонда кутаман. Биринчи ташриф бўлиши керак. Биринчи сафарда Самарқандга келаман, деб ваъда бергансиз. Сизни кутяпмиз. Илтимос, Самарқандга ташриф буюришингиз керак.

Доналд Трамп: Бу менга ёқди. Мамнуният билан бу ҳақида ўйлаб кўраман. Раҳмат.

Ҳақиқатан ҳам ажойиб фаолият, ажойиб инсонлар гуруҳи. Жуда ақлли мамлакат ва улар ҳақиқатан ҳам яхши натижаларга эришди. Америкадан қилган харидингизни қадрлайман. Раҳмат, биз сизни қўллаб-қувватлаймиз.

Шавкат Мирзиёев: Суҳбат жуда ёқимли бўлди, катта раҳмат.