Иқтисодий тадқиқотлар ва ислоҳотлар маркази томонидан президент Шавкат Мирзиёевнинг БМТ Бош ассамблеясининг 80-сессиясидаги нутқи лингвистик жиҳатдан ўрганилди. Таҳлил жараёнида давлат раҳбарининг нутқида қайси атамалар ва мавзуларга кўпроқ эътибор қаратилгани аниқланди.
Маълумотларга кўра, энг кўп ишлатилган сўз бирикмаси — «Марказий Осиё» бўлиб, у 6 марта тилга олинган. Шунингдек, «доимий ривожланиш» ибораси ҳам нутқда 4 марта такрорлангани қайд этилди.
Таҳлил натижаларига асосан, президент нутқида минтақавий ҳамкорлик ва барқарор тараққиёт масалаларига устувор аҳамият берилган. Шу билан бирга, инсон капиталига дахлдор муҳим йўналишлар — хотин-қизларнинг жамиятдаги роли, соғлиқни сақлаш тизимини мустаҳкамлаш ҳамда сув ресурсларидан оқилона фойдаланиш масалаларига алоҳида урғу қаратилган.
Марказ мутахассисларининг тақдим этган маълумотларига кўра, давлат раҳбари нутқидаги сўзларни мавзулар бўйича таҳлил этиш натижасида асосий эътибор икки йўналишда жамланган: Марказий Осиё доирасидаги ҳамкорлик (18 фоиз) ва транспорт ҳамда экологик муаммолар (18 фоиз).
Шу тариқа, Шавкат Мирзиёевнинг БМТдаги чиқиши нафақат минтақавий сиёсат, балки глобал аҳамиятга эга долзарб йўналишлар — экологик барқарорлик, соғлиқни сақлаш ва гендер масалаларига ҳам чуқур ёндошилганини намоён қилди.
«Замин»ни Telegram’да ўқинг!
