Президент Шавкат Мирзиёев раислигида маҳалла тизимини такомиллаштириш ва жойлардаги ишларни самарали ташкил этиш бўйича видеоселектор йиғилиши бўлиб ўтди. Унда маҳаллалардаги инфратузилмани яхшилаш, аҳоли турмуш даражасини ошириш ва ҳудудларни барқарор ривожлантириш масалалари муҳокама қилинди.
Давлат раҳбари ўз сўзида маҳалла тизими фақат маъмурий бирлик эмас, балки жамиятнинг юраги эканини таъкидлаб, уни замон талабига мос равишда ривожлантириш муҳимлигини қайд этди.
Ўтган ҳафта имзоланган қарорга мувофиқ, Янги Ўзбекистон қиёфаси намоён бўладиган 33 та туман ва 330 та “оғир” аҳволдаги маҳалла аниқланди. Ҳар бир туманга 100 миллиард сўм, ҳар бир маҳалла учун эса 5 миллиард сўм маблағ ажратилади.
Шунингдек, Жаҳон банки ва Ислом тараққиёт банкидан жалб қилинган 100 миллион доллар маблағ ҳам айнан шу ҳудудлардаги лойиҳаларни амалга оширишга йўналтирилади.
Бундан ташқари, “драйвер” деб номланган асосий лойиҳалар инфратузилмасини барпо этиш учун қўшимча 2 триллион сўм маблағ ажратиш режалаштирилган. Умуман олганда, дастур доирасида 7 триллион сўмдан ортиқ маблағ маҳалла ҳаётини яхшилашга сарфланади.
Президент йиғилишда вилоят ва туман раҳбарларига аниқ вазифаларни белгилаб берди. Ҳар бир вилоят ҳокими 2 тадан, туман ҳокимлари эса 1 тадан оғир аҳволдаги маҳаллани танлаб, уларни ривожлантириш учун алоҳида масъулиятни ўз зиммасига олади.
Бу маҳаллаларга 5 миллиард сўмдан маблағ йўналтирилиши белгиланган бўлиб, натижада 236 та маҳалла аҳолиси турмушида сезиларли ўзгариш бўлиши кутилмоқда.
Дастур доирасида йўл, сув, электр ва коммуникация тармоқларини янгилаш, тадбиркорликни ривожлантириш, таълим ва тиббиёт инфратузилмасини мустаҳкамлашга ҳам алоҳида эътибор қаратилмоқда.
Президент таъкидлаганидек, маҳалла — ислоҳотлар маркази, халқнинг розилиги эса асосий мезон. Шу боис, бу дастур ҳар бир хонадоннинг ҳаётига ижобий таъсир кўрсатиши, одамларда ишонч ва янгиланиш ҳиссини кучайтириши зарур.
Шундай қилиб, янги ташаббус маҳаллаларни нафақат янгилаш, балки уларни иқтисодий, ижтимоий ва маънавий жиҳатдан кучли марказга айлантиришга қаратилган. Янги дастур амалиётга кириши билан маҳалла ҳаётидаги ўзгаришлар ҳар бир фуқаро томонидан ҳис этилади.
“Zamin”ни Telegram'да ўқинг!
