Ўзбекистонда ноябр ойи бошидан ҳаво кескин ўзгариши мумкин. Бу ҳақда Ўзгидромет маълум қилди. Синоптикларнинг қайд этишича, айниқса ойнинг биринчи ҳафтасида республика бўйича ҳароратнинг пасайиши ва ёмғирли кунлар сонининг кўпайиши кутилмоқда.
Маълумотларга кўра, 3 ноябрь куни мамлакатнинг шимолий ҳудудларига совуқ ва нисбатан нам ҳаво оқими кириб келади. Бу массалар кейинчалик барча вилоятларга тарқалади. 4–6 ноябрь кунлари республика бўйлаб ҳаво кескин совиб, ёғингарчилик эҳтимоли ортади.
Синоптиклар маълум қилишича, айниқса, 3–5 ноябрь кунлари айрим ҳудудларда ёмғир ёғиши кутилмоқда, тоғолди ва тоғли жойларда эса қор ёғиши эҳтимоли юқори. Бу табиий ҳолат ноябр ойининг биринчи ҳафтасини салқин ва нам қилишини англатади.
4–6 ноябр кунларида ҳарорат аста-секин пасайиб, кечалари 0…+3 даража атрофида бўлади. Айрим вилоятларда ҳарорат манфий кўрсаткичларга ҳам тушиши мумкин. Кундузги пайтда эса ҳарорат +8…+13 даражани ташкил этади.
Метеорологлар айтишича, бу йилги ноябр ойи илк кунлариданоқ республикада қиш мавсумининг яқинлашганини ҳис эттиради. Ҳаво ҳароратининг кескин пасайиши нафақат шимолий ҳудудларда, балки марказий ва жанубий вилоятларда ҳам сезилади.
Синоптиклар аҳолидан эҳтиёт чораларини кўришни, айниқса, қишлоқ хўжалиги билан шуғулланувчи фуқароларни совуқга тайёргарлик кўришга чақирмоқда. Ҳаво ҳароратининг тушиши сабзавот ва меваларнинг охирги ҳосилига ҳам таъсир кўрсатиши мумкин.
Шунингдек, муҳандислик коммуникациялари ва иситиш тизимларига масъул ташкилотлардан ҳам тайёрликни кучайтириш сўралди. Ҳаво совиши туфайли энергия истеъмоли кескин ортиши кутилмоқда.
Ўзгидромет маълумотларига кўра, бу совуқ тўлқини узоққа чўзилмайди ва 7 ноябрдан бошлаб ҳаво ҳарорати аста-секин меъёрга яқинлашади. Аммо ноябрнинг иккинчи ярмида яна бир бор шундай совуқ фронтлар қайтиб келиши эҳтимоли бор.
Шундай қилиб, ноябр ойи Ўзбекистон аҳолиси учун совуқ ва ёмғирли бошланиши кутилмоқда. Синоптиклар барчадан об-ҳаво маълумотларини диққат билан кузатиб боришни, иссиқ кийимда юришни ва узоқ саёҳатлар режасини шунга мос равишда белгилашни тавсия этмоқда.
“Zamin”ни Telegram'да ўқинг!
