Ўзбекистонда фармацевтика соҳасида кенг қамровли ислоҳотлар амалга оширилмоқда. Бу ислоҳотларнинг асосий мақсади дори воситаларини импорт қилишни соддалаштириш ва давлат рўйхатидан ўтказиш муддатларини сезиларли даражада қисқартиришдир.
Президент Шавкат Мирзиёевга тақдим қилинган мазкур янгиликлар сифатли дори воситаларининг аҳолига етказиб берилишини яхшилаш ҳамда миллий тизимни халқаро стандартларга мослаштиришга қаратилган. Ислоҳотлар марказида технологиялар трансфери механизми ётади.
Ушбу механизм хорижий фармацевтика компанияларига Ўзбекистонда ишлаб чиқаришни йўлга қўйиш ва кейинчалик уларни тезкор рўйхатдан ўтказиш имконини беради. Бу ички бозордаги дори воситалари таъминотини ошириш ва экспорт салоҳиятини мустаҳкамлашга хизмат қилади.
Генерик дорилар билан боғлиқ тартиблар ҳам сезиларли даражада ўзгаради. Уларнинг клиник синовлари эндиликда халқаро стандартларга мувофиқ ўтказилади, бу эса уларнинг бозорга тезкор чиқишини таъминлайди.
Шунингдек, илғор биотехнологик хужайра препаратларини амалиётга жорий этиш учун шароитлар яратилмоқда. Фармацевтика маҳсулотлари хавфсизлиги маркази директори Алишер Темировнинг сўзларига кўра, хавфсизликнинг тўрт категорияси бўйича дифференциал рўйхатдан ўтказиш тизими жорий этилган.
Бу энг хавфсиз категориядаги аризаларни кўриб чиқиш муддатини 150 кундан 60 кунга, иккинчи категория учун 90 кунга, нисбатан хавфли категориялар учун эса 120 кунга қисқартирди. Бундан ташқари, биринчи хавфсизлик синфидаги тиббий маҳсулотлар (стерил ва инвазив бўлмаганлар) лаборатория ва клиник синовлардан озод қилинди.
Ушбу чора-тадбирлар аҳолининг хавфсиз дори воситалари билан таъминланиши ва сертификатланган маҳсулотларни импорт қилишни соддалаштиришга қаратилган. Янги оригинал дори воситасини ишлаб чиқиш ва бозорга чиқариш жараёни 10 йилдан 15 йилгача давом этиши ва 2 миллиард доллардан кўпроқ харажат талаб қилиши мумкин.
Шунинг учун инновацион дори воситалари генерик дориларга қараганда анча қиммат бўлади.
