Тошкент метросида йўловчилар тиғизлигига аниқлик киритилди
«Пахтакор» метро бекатидаги йўловчилар тиқилиши 18:20 ва 18:50 оралиғида йўловчилар оқими кескин ошгани ҳамда икки томондан поездлар қисқа фурсатда етиб келгани сабабли юзага келган. Аксарият йўловчилар бошқа йўналишга ўтишни режалаштиргани вазиятни янада кучайтирган.
Тошкент метрополитени матбуот хизмати «Пахтакор» метро бекатида йўловчилар тиғизлиги юзасидан изоҳ берди. Таъкидланишича, ушбу ҳолат ижтимоий тармоқларда кенг муҳокама қилинган.
Ўрганишлар натижасида маълум бўлдики, ҳодиса 18:20 ва 18:50 оралиғида, йўловчилар оқими кескин ошган пайтда содир бўлган. Шу вақт ичида икки томондан поездлар қисқа фурсатда етиб келган ва аксарият йўловчилар бошқа йўналишга ўтишни режалаштирган.
Мутасаддилар бундай вазиятларни тезкор бартараф этиш учун барча йўналишларда қўшимча захира поездлар ҳаракатини жорий этганликларини маълум қилишди. Натижада, тиғизлик одатда 3-4 дақиқада бартараф этилади.
Шуни ҳам алоҳида қайд этиш жоизки, сўнгги вақтларда метрога бўлган талаб сезиларли даражада ошган. Йўловчилар автобус ва маршруткалар ўрнига метро транспортни афзал кўришмоқда.
Изоҳлар 0
…