Тошкент аэропортининг эски юк терминали аукционга қўйилди

Тошкент халқаро аэропортининг эски юк терминали ижарага бериш учун аукционга қўйилди. Бу ҳақда "Uzbekistan Airports" матбуот хизмати хабар берди.

Маълум қилинишича, E-auksion.uz онлайн платформасида Ислом Каримов номидаги Тошкент халқаро аэропортининг эски юк комплекси савдога қўйилган. Бинонинг умумий майдони 6 882 квадрат метрни ташкил этади.

Йиллик ижара учун бошланғич нарх 16,9 миллиард сўм этиб белгиланган, бу суммага қўшилган қиймат солиғи киритилмаган. Мазкур бино ва иншоотлар юк авиацияси ташувчиси учун ижарага берилиши режалаштирилган бўлиб, у ерда юкларни вақтинча сақлаш ва қайта ишлаш фаолиятини самарали юритиш имконияти таъминланади.

Аукцион иштирокчилари учун ижара талабларига жавоб беришга оид махсус қоидалар белгиланган. Савдо 24-ноябр куни бўлиб ўтиши режалаштирилган.

Abror Tovmurodov

«ZAMIN.UZ» муҳаррири