Бугун соғлиқни сақлаш тизими ходимлари билан бўлиб ўтаётган муҳим учрашувда давлат раҳбари тиббиёт соҳаси ривожланиши ҳақида сўз юритди. Президент таъкидлаганидек, бу тадбирнинг айнан салкам бир асрдан буён шифокор кадрлар тайёрлаб келаётган Тошкент давлат тиббиёт университетида ўтказилаётгани бежиз эмас. Бу жой — тиббиёт таълимининг асосий устуни, юртимиздаги минглаб шифокорларнинг илк сабоқхонасидир.
Шавкат Мирзиёев сўзларига кўра, сўнгги йилларда мамлакатда тиббиёт соҳаси кескин ўзгаришларни бошдан кечирмоқда. Янги, юқори технологик ускуналар жорий этилмоқда, замонавий клиникалар қурилаётгани, шифокорлар малакасини ошириш учун қулай шароит яратилаётгани қайд этилди. Аммо, Президент таъкидлаганидек, бу клиникаларда ким ишлайди — бу саволнинг жавоби ҳам аниқ: “Янги Ўзбекистоннинг бунёдкор ўғил-қизлари”.
Шу муносабат билан давлат раҳбари тиббий таълимни тубдан ислоҳ қилиш ва оилавий шифокорлик тизимини ривожлантириш зарурлигини алоҳида таъкидлади. «Тиббиётга юқори технологик ускуналар олиб киряпмиз, янги клиникаларни барпо этяпмиз. Уларда ким ишлайди? Албатта, ўз юртига фидойи, замонавий билимга эга шифокорлар», — деди Президент.
Янги таълим ислоҳотларига кўра, келгуси ўқув йилидан тиббиёт олийгоҳларида “Умумий тиббиёт” факультетлари очилади. Бу факультетлар педиатрия ва даволаш йўналишларини ўз ичига олади. Шунингдек, резидентура ва магистратура босқичларида оилавий шифокорлик бўйича махсус йўналиш жорий этилади.
Энг муҳим янгиликлардан бири — резидентурада ўқиётган талабалар учун яратилган имтиёзлардир. Улар бепул таълим олиш билан бирга оилавий шифокор сифатида амалда ишлаб маош олади. Таълимни муваффақиятли якунлаган битирувчиларга тор соҳа бўйича махсус диплом берилади ва уларнинг маошига 150 фоизли устама қўлланилади.
Президент таъкидлаганидек, бу тизим нафақат ёшлар учун янги имконият, балки мамлакат соғлиқни сақлаш тизимида янги босқични бошлаб беради. Оилавий шифокорлар ҳар бир маҳалланинг асосий суянчи, аҳоли саломатлигининг энг яқин кузатувчисига айланади.
Бу ислоҳотлар натижасида тиббий таълим амалиёт билан янада чамбарчас боғланади, ёш мутахассислар тўғридан-тўғри жойларда иш тажрибасига эга бўлади. Энг муҳими, халқ замонавий ва малакали тиббий хизматдан барқарор фойдаланиш имконига эга бўлади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
