Мирзо Улуғбек туманида 25 млн долларлик савдо мажмуаси қурилды

Президент Шавкат Мирзиёев 23 апрель куни Тошкент шаҳрининг Мирзо Улуғбек туманида барпо этилган "Павилион" савдо мажмуасига ташриф буюрди. Мазкур лойиҳа қурилиш материаллари савдосига ихтисослашган бўлиб, унинг умумий қиймати 25 млн долларни ташкил этади. Мажмуа 4,6 гектар майдонни эгаллаган ва 1000 та автомобилга мўлжалланган тураргоҳга эга. Бу ҳақда Spot.uz хабар беради.

Уч қаватли асосий бинода умумий майдони 42 минг квадрат метр бўлган 500 та савдо дўкони жойлашган. Лойиҳа "Оил Газ Эқуипмент" компанияси томонидан амалга оширилган бўлиб, бу ерда қурилиш ва таъмирлаш учун зарур бўлган кенг турдаги маҳсулотлар сотилади. Савдо шаффофлигини таъминлаш мақсадида барча товарлар ва уларнинг нархлари ҳақидаги маълумотлар ягона электрон платформага жойлаштирилади.

Мажмуа йилига 3 млн нафаргача мижозга хизмат кўрсатиш қувватига эга ва бу ерда 2 мингта янги иш ўрни яратилади. Йиллик солиқ тушумлари 32,3 млрд сўм миқдорида прогноз қилинмоқда. Хавфсизликни таъминлаш учун 500 та кузатув камераси ўрнатилган, электр энергияси эса 1,2 МВт қувватли қуёш панеллари орқали етказиб берилади.

Давлат раҳбари мажмуа қурилиш материаллари соҳасида янги сифат ва хизмат кўрсатиш стандартларини шакллантириши лозимлигини таъкидлади. Шунингдек, Тошкент атрофида турли йўналишларга ихтисослашган шундай марказларни кўпайтириш бўйича топшириқ берилди. Мирзиёев халқнинг турмуш даражаси ошиб бораётганини қайд этиб, бундай масканларда маҳаллий ишлаб чиқарувчиларни қўллаб-қувватлаш ва логистикани тўғри йўлга қўйиш зарурлигини айтди.