Ўзбекистонда энг кўп аҳоли қайси ҳудудда экани очиқланди

2026 йилнинг 1 апрель ҳолатига кўра, Ўзбекистоннинг доимий аҳолиси сони 38 миллион 382 минг 685 нафарга етди. Бу кўрсаткич ўтган йилнинг шу даврига нисбатан 684,9 минг кишига ёки 1,8 фоизга ошган. Тегишли маълумотлар Миллий статистика қўмитаси томонидан эълон қилинди.

Ҳудудлар кесимида таҳлил қилинганда, аҳолиси энг кўп бўлган вилоят сифатида Самарқанд вилояти етакчиликни сақлаб қолди. Бу ҳудудда 4 миллион 396,8 минг нафар аҳоли истиқомат қилмоқда. Ундан кейинги ўринларда Фарғона ва Қашқадарё вилоятлари қайд этилган.

Аксинча, аҳолиси энг кам ҳудуд сифатида Сирдарё вилояти қайд этилди — бу ерда 949,6 минг киши яшайди.

Мутахассислар фикрича, ҳудудлар ўртасидаги бундай тафовутга табиий ўсиш даражаси, миграция жараёнлари ҳамда иқтисодий омиллар таъсир кўрсатмоқда. Айниқса, йирик ва инфратузилмаси ривожланган ҳудудларда аҳоли сонининг тезроқ ошиши кузатилади.

Қуйида ҳудудлар бўйича доимий аҳоли сони келтирилади:

• Самарқанд вилояти — 4 396,8 минг киши;
• Фарғона вилояти — 4 239,4 минг киши;
• Қашқадарё вилояти — 3 731,8 минг киши
• Андижон вилояти — 3 533,9 минг киши;
• Наманган вилояти — 3 202,7 минг киши;
• Тошкент шаҳри — 3 195,9 минг киши;
• Тошкент вилояти — 3 174,6 минг киши;;
• Сурхондарё вилояти — 3 024,9 минг киши;
• Бухоро вилояти — 2 112,2 минг киши;
• Хоразм вилояти — 2 075,0 минг киши;
• Қорақалпоғистон Республикаси — 2 057,7 минг киши;
• Жиззах вилояти — 1 573,2 минг киши;
• Навоий вилояти — 1 115,0 минг киши;
• Сирдарё вилояти — 949,6 минг киши.

Умуман олганда, мамлакатда аҳоли сонининг барқарор ўсиб бораётгани кузатилмоқда. Бу эса ижтимоий-иқтисодий тараққиётни жадаллаштириш, янги иш ўринларини яратиш ҳамда инфратузилмани янада ривожлантириш заруратини кучайтирмоқда.