Шавкат Мирзиёев: Вақти келганида Халқаро Пресс клубда ўзим ҳам иштирок этаман

Видеоселекторда иштирок этган Кун.uz мухбирининг маълум қилишича, Давлат раҳбари мажлисда Халқаро Пресс-клуб фаолиятига алоҳида тўхталди. Президент “ХПК шунчаки ташкил этилмагани, у ҳудудлардаги ўзгаришларни акс эттириши”ни қайд этди. Ўзбекистон Президенти ХПКнинг жойларда сайёр сессияларини жорий этганини юқори баҳолади.

Мирзиёев, ХПКнинг ҳар бир сессиясини бевосита кузатишини айтар экан, видеоселекторда раҳбарларга ХПК сессияларига муовинларини юборишни тақиқлади. Бундан кейин Президент топшириғига биноан Халқаро Пресс-клубнинг барча йиғилишларида фақат вазирликлар, ҳокимликлар, идора ва ташкилотларнинг биринчи раҳбарлари иштирок этади.


“Пресс-клубга ўринбосарлар бормасин”, - дея алоҳида уқдирди Давлат раҳбари. Шу ўринда, Шавкат Мирзиёев вақти келганида ХПК сессиясида ўзи ҳам иштирок этишини алоҳида таъкидлади.


Президент Мирзиёев Давлат раҳбари, хусусан, Пресс-клубнинг ўтган ҳафтада Сирдарё, Жиззах, Самарқанд ва Навоий вилоятларига уюштирган сафарига эътибор қаратиб, Сирдарё ва Жиззах вилоятларида амалий ўзгаришлар кўлами кенглигини ушбу сайёр сессиялар ҳам исботлаганини билдирди. Бундан ташқари, Президент Самарқанд вилояти ҳокими Туробжон Жўраевнинг фаолиятини ҳам ижобий баҳолаб, вилояти ҳокими лавозимига тайинланганига қисқа вақт бўлганига қарамай, унинг халқ орасига кирганини ХПКнинг сайёр сессиясидаги сўзларидан билиш мумкин бўлган.


Президентнинг айтишича, вилоят ҳокимларининг ХПКдаги иштироки ва унда жавоб беришларидан уларнинг халқ орасига қанчалик кириб боргани, дарду-ташвишидан нақадар хабардор эканини билиб олса бўлади.


Шу ўринда, таъкидлаш жоизки, Президент Мирзиёев ХПКнинг “Ўзавтосаноат” АЖга вилоятларга сафарларни ташкил этиш учун автобус сўраб қилган мурожаатидан хабар топгач, “Ўзавтосаноат” АЖ раҳбариятига Пресс-клуб учун энг сўнгги русумдаги юмшоқ ўриндиқли “Isuzu” автобусни Президент номидан совға қилиш вазифасини топширган.




Манба: Kun.uz “Замин” янгиликларини “Youtube”да кузатиб боринг