Ўзбекистонда ўз вақтида талаб қилинмаган пенсия пулларини тўлаш муддати қисқартирилди

Ўзбекистонда пенсионерлар томонидан ўз вақтида талаб қилиб олинмаган пенсия пуллари ўтган давр учун пенсияни олиш учун мурожаат қилган вақтдан бошлаб 12 ойдан кўп бўлмаган давр учун тўланади. UZ24’нинг хабар беришича, ҳозиргача бу давр 3 йилни ташкил қилган эди.

Аввал пенсионер хорижга ёки республиканинг бошқа бир вилоятига чиқа туриб, уч йиллик давр ичида исталган давр учун ўзининг талаб қилиб олинмаган пенсия пулини олиши мумкин эди, бироқ 2015 йилнинг 1 январидан бошлаб энди пенсионер ўз пенсия пулини фақатгина бир йил муддат ичида талаб қила олиши мумкин, деб хабар беради Norma.uz.

Агар пенсия пули Пенсия жамғармаси бўлимларининг айби билан ўз вақтида тўланмаган бўлса, пенсионер, қандай муддат ўтганидан қатъий назар, ўтган бутун давр учун пенсия пули тўланишини талаб қилиши мумкин.

Шунингдек, агар жисмоний имкониятлари чекланган шахс ўз ногиронлигини тасдиқловчи кўрикдан узрли сабабларга (касалхонада даволаниш, ўқиш ёки хизмат сафарида бўлган ҳолларда) кўра ўз вақтида қайта ўтмаганда ўтган давр учун ногиронлик нафақалари тўлаш шартлари 3 йилдан ошмаган муддатда сақланиб қолади.

манба: Kun.uz