Сепли бўлгунча...

Тунов куни автобусда кетаётган эдим. Ёнимдаги ўриндиқда ўтирган қиз ҳозиргина бекатдан чиққан қиз билан қучолашиб кетди: -Вой, Дили, бормисан? -Ўзингмисан, Гули? - Очилиб кетибсан. Поччам яхши йигитга ўхшайди! -Ҳе, ўлсин, -деди қўл силтаб Дилрабо исмли қиз. -Нега? Уришиб қолдиларингми? -Ажрашдик. -Вой, нималар деяпсан, Дили? Бир ой бўлмасидан-а? -таажжубланди Гули. -Ахир уни севардинг-ку? -Онаси ўлгур ёмонлигини мен қайодан билай? Эрталаб барвақт турилган уйда фаришта бўлармиш. Келин келиндек бўлиши керакмиш. Эшикдан ким кирса, салом берармишман, ўн марта бўлса ҳам. Кечқурун албатта қозон-товоқни ювиб қўйишим шартмиш. Эрталаб юваманми, обедда юваманми- бу менинг ишим, тўғрими? Хуллас, ҳиқилдоғимга келди. Онаси билан уришиб қолувдим, ўша куниёқ масалани ҳал қилдим: "Ё мени денг, ё онангизни", десам, эрим нуқул ҳиринглаб кулади: :Ҳам сизни дейман, ҳам онамни". "Бўлмаса, бор ўша онанг билан қўшмозор бўл" дедим-да, хайр-маъзурсиз уйга жўнавордим. Дугоналар кейин бекатга тушиб қолдилар. Негадир ўзининг ҳаётига енгил-елпи қараётган Дилрабонинг гапи мени ҳайратга солди. Ҳали келинлик либосини ечмай туриб оила, ўзи севган, кўнгил берган эрининг баҳридан ўтиш уни заррача ташвишлантирмаётганлигига ажабланасан киши. Хўш, келин уйда рўмол ўраб юришининг нимаси ёмон? Эшикдан кириб келган одамга эса салом бермаслик одобсизлик эмасми? Яна қозон- товоқни ювмаган келин қанақа келин ўзи? Қайнонанинг ўгитларини ножўяликка олган Дилрабо қаттиқ янглишади. Ким билсин, ҳали орадан анча вақт ўтар, Дилрабо яна оила қуриб қайнонали ҳам бўлар, лекин ишончим комилки, у ўзининг қилмишидан афсусланади...Унда кеч бўлади, жудаям кеч. Ёшликнинг қадрига етмай, биринчи турмушидан сабабсиз ажралгани учун бир умр пушаймон бўлиб яшайди. Турмушда учрайдиган икр-чикрлар туфайли муросаси қочиб, ажралишаётганлар қанча?".

Назаримда, оилада қиз боланининг ор-номусли, иффатли, гўзал хулқли қилиб тарбиялашдан ташқари уни келажакда оила тебратиб кетиши учун лозим бўлган бошқа бир қатор фазилат эгаси ҳам қилиб тарбиялаш керакдай кўринади. Кечиримли, катталарга ва турмуш ўртоғига ўта ҳурматли бўлган, озода, ширинсўз, қолаверса, турмушнинг бор- йўғига сабр қилиб, тежамкор, тадбиркорлик фазилатларига эга бўлган келинларгина ўз тумуш ўртоқларига муносин ёр, қайноналарига суюкли келин бўла оладилар. «Замин»ни Telegram’да ўқинг!