Майкл Помпео Ўзбекистонга келишини тасдиқлади

АҚШ Давлат департаменти раҳбари Майкл Помпео 2020 йилда Ўзбекистонга келишига оид хабарларни тасдиқлади.

«Янги йилда Украина, Беларусь, Қозоғистон, Ўзбекистон ва Кипрга сафар қилиб, ҳамкасбларим билан кўришиш ҳамда АҚШ сиёсатининг Европа ва Марказий Осиё бўйича устувор йўналишларини тасдиқлашни интизорлик билан кутяпман», – деб ёзди Помпео Twitter саҳифасида.

Excited to travel to Ukraine, Belarus, Kazakhstan, Uzbekistan, and Cyprus in the new year to meet with counterparts and affirm U.S. priorities across #Europe and South Central Asia.
— Secretary Pompeo (@SecPompeo) December 30, 2019

АҚШ Давлат департаменти пресс-релизида қайд этилишича, Помпео турнесини 3 январь куни Украинадан бошлайди. У Киевда Украина президенти Владимир Зеленский, ТИВ раҳбари Вадим Пристайко ва Мудофаа вазири Андрей Загороднюк билан музокаралар ўтказади.

4 январь куни Помпео Минскда бўлиб, Беларус президенти Александр Лукашенко ҳамда Ташқи ишлар вазири Владимир Макей билан учрашади.

5 январь куни у Нур-Султонга учади, уни Қозоғистон президенти Қосим-Жўмарт Тўқаев қабул қилади, у шунингдек Қозоғистоннинг биринчи президенти Нурсултон Назарбоев ҳамда ТИВ раҳбари Мухтар Тлеуберди билан учрашувлар ўтказади.

5-6 январь кунларида Помпео Тошкентда бўлади, у бу ерда Ўзбекистон президенти Шавкат Мирзиёев ҳамда Ташқи ишлар вазири Абдулазиз Комилов билан учрашади. Бундан ташқари, у бу ерда Ўзбекистон, Қозоғистон, Қирғизистон, Тожикистон ва Туркманистон ташқи ишлар вазирлари билан бирга «C5+1» шаклидаги учрашувда иштирок этади.

7 январь куни у Кипрга келади, у бу ерда республика президенти Никос Анастасиадис ва ТИВ раҳбари Никос Христодулидис билан музокаралар ўтказишни режалаштирган.

Қайд этиш жоиз, Америка ташқи сиёсат идораси раҳбарининг Тошкентга келиши – Ўзбекистон президенти Шавкат Мирзиеёвнинг февраль ойи бошида Россияга ташрифи арафасига тўғри келмоқда.

Бундан аввалроқ, Помпео Қозоғистонга ташрифи давомида АҚШнинг Марказий Осиё бўйича стратегиясини тақдим этиши хабар қилинганди.

Янгиликлар