Дунёдаги энг йирик электромобиль ишлаб чиқарувчилардан бири — Tesla 2025 йилнинг учинчи чорагида ўз тарихидаги энг катта молиявий пасайишни қайд этди. Компаниянинг ҳисоботига кўра, соф фойда ўтган йилнинг шу даврига нисбатан 37 фоизга камайган.
Ҳисобот даври — июлдан сентябргача бўлган уч ойлик натижаларга кўра, Tesla’нинг жаҳон миқёсидаги соф фойдаси 1,37 миллиард долларни ташкил этди. Бу рақам 2024 йилнинг шу даврида қайд этилган 2,17 миллиард доллардан деярли икки баробар кам.
Компания йил бошидан сентябр охиригача бўлган умумий натижаларни ҳам таҳлил қилиб, даромаднинг умумий миқёсида 37 фоизлик пасайишни аниқлаган. Tesla бу ҳолатни асосан АҚШдаги божхона тўловларининг ортиши, айрим таъминот занжирларидаги муаммолар ва ички қайта ташкилотлаштириш жараёнларига сарфланган катта харажатлар билан изоҳлаган.
Таҳлилчиларнинг фикрича, бу ҳолат компания учун келгуси чоракда ҳам осон кечмаслиги мумкин. Улар сентябрь ойида кузатилган сотувлар ўсиши вақтинчалик бўлганини ва келаси ойларда бу суръат секинлашиши эҳтимолини билдирмоқда.
Шу билан бирга, Tesla жаҳон электромобиль бозоридаги етакчилик позициясини ҳам йўқота бошлади. Компаниянинг узоқ йиллардан бери асосий рақиби бўлган Хитойнинг BYD корпорацияси бу йилги кўрсаткичлар бўйича Tesla’ни ортда қолдирди. Ҳозирда BYD жаҳон миқёсида электромобиллар савдосида устунликни қўлга киритган ҳолда, бозорда етакчи ўринни эгаллаб турибди.
Молия бозорлари кузатувчилари Tesla’нинг кейинги чорак натижаларига катта эътибор қаратмоқда. Улар компанияни соф фойдани барқарорлаштириш, янги моделлар тақдимотини кучайтириш ва энергия тежамкор технологияларни жорий этиш орқали рақобатга бардош бериш зарурлигини таъкидлашмоқда.
Айни вақтда Tesla вакили Reuters’га маълум қилганидек, компания АҚШ ва Европа бозорларида талабни тиклаш, шунингдек, Model 3 ва Cybertruck сотувларини кенгайтириш орқали йил охирида иқтисодий кўрсаткичларни яхшилашни режалаштирмоқда.
Мутахассислар таъкидлаганидек, электромобиллар бозорида рақобат йил сайин кучаймоқда. Агар Tesla янги авлод маҳсулотларида технология ва нарх мувозанатини сақлай олмаса, BYD ва бошқа осиёлик ишлаб чиқарувчиларнинг устунлиги янада мустаҳкамланиши мумкин.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
