“Ўзбекистон – 2030” стратегиясининг қайта кўриб чиқилган лойиҳасида мамлакатда енгил автомобиллар ишлаб чиқариш ҳажмини кескин ошириш асосий мақсадлардан бири сифатида қайд этилган. The Gulf Observer манбасига таянилган хабарларда 2030 йилга бориб ишлаб чиқариш қарийб 1 миллион донага етиши кутилмоқда.
Маълум қилинишича, йўл харитаси босқичма-босқич ўсишни кўзда тутади: 2026 йилда 460 минг, 2027 йилда 550 минг, 2028 йилда 700 минг донага чиқиш режалаштирилган. 2029 йилда 800 минг донадан ошиб кетиши, 2030 йилга бориб эса деярли 1 миллион донага яқинлашиши айтилмоқда.
Бу рақамлар “қоғоздаги орзу” эмас, чунки охирги статистика ҳам саноат суръати ошганини кўрсатяпти. Миллий статистика қўмитаси маълумотига кўра, 2025 йилнинг январ–ноябр ойларида Ўзбекистонда 419 338 дона енгил автомобил ишлаб чиқарилган. Ўртача ойлик ҳажм 38 121 донани ташкил этган. Энг қизиғи — 11 ойлик натижанинг ўзи 2024 йил давомида ишлаб чиқарилган 399 327 дона автомобилдан юқори.
Ишлаб чиқаришда етакчи улуш ҳозирча UzAuto Motors'да сақланиб қолгани қайд этиляпти. Лекин энг юқори ўсиш суръати BYD'да кузатилган: 2024 йилнинг дастлабки 11 ойида 2 198 та автомобил ишлаб чиқарган компания 2025 йилнинг шу даврида 17 510 тага чиққан. Яъни, бир йилда бир неча баробар ўсиш.
Шу билан бирга, Ўзбекистонда Kia, Chery ва Haval каби брендлар ҳам ишлаб чиқариш ҳажмларини кенгайтиргани таъкидланади. Миллий статистика маълумотларида бу брендлар бўйича ҳам чиқарилган автомобиллар рақамлари келтирилган.
Хулоса шундай: агар режалар амалда ҳам шу суръатда кетса, 2030 йилгача Ўзбекистонда автомобил ишлаб чиқариш бозори “бир нечта завод” эмас, бутун бошли катта индустрияга айланади. Албатта, 1 миллионга чиқиш учун локаллашув, экспорт, эҳтиёт қисмлар занжири ва кадрлар масаласи ҳал қилувчи бўлади. Лекин йўналиш аниқ: тезлик ошяпти, рақобат кучайяпти ва бозор энди янада қизиқ бўлади.
“Zamin”ни Telegram'да ўқинг!
