"Russo-Balt" бренди ўзининг янги К55 кроссовери қайси машҳур моделлар билан рақобатлашишини маълум қилди. Компания вакилининг сўзларига кўра, ўлчамлари ва нархи бўйича Lexus LX 570, BMW X6, Porsche Cayenne ҳамда Mercedes-Benz ГЛС автомобиллари ушбу моделнинг асосий рақобатчилари ҳисобланади. Бу ҳақда Ixbt.com хабар беради.
Янги кроссовер техник жиҳатдан жуда кучли бўлиши кутилмоқда. Автомобил 550 от кучига эга иккита электр двигател ва тўлиқ узатмали тизим билан жиҳозланади. Энг қизиқарли жиҳати шундаки, кузов панеллари зангламайдиган пўлатдан тайёрланади, бу эса автомобилнинг узоқ умр кўришини таъминлайди.
К55 моделининг умумий оғирлиги 3,5 тоннадан ошмайди, бу эса уни бошқариш учун Б тоифали ҳайдовчилик гувоҳномаси етарли бўлишини англатади. Автомобилнинг жиҳозланиши ҳам юқори даражада: панорамали том, 20 дюймли ғилдирак дисклари, иситиш ва вентиляция функцияли чарм ўриндиқлар ҳамда 15 дюймли сенсорли дисплей шулар жумласидандир.
Компания топ-версияда 1000 от кучига эга тўртта электр двигател, пневматик осма тизим ва ҳатто масофани узайтирувчи бензинли генераторни ҳам таклиф қилишни режалаштирмоқда. Жорий йилнинг апрель ҳолатига кўра, ушбу автомобилнинг нархи 8 миллион рублни ташкил этган.
“Zamin”ни Telegram'да ўқинг!
