Жаҳон автомобиль бозоридаги вазият қандай? Қайси давлатда қайси темир тулпор энг харидоргир? Focus2Move таҳлилий компанияси томонидан тайёрланган янги ҳисобот 61 та давлатдаги вазиятни ойдинлаштириб берди. 2025 йил якунлари ва айрим мамлакатлар учун 2024 йилги кўрсаткичларга асосланган ушбу маълумотлар дунё автомобиль харитасидаги қизиқарли манзарани намойиш этмоқда.
Toyota — дунёнинг мутлақ ҳукмдори
Япониянинг машҳур Toyota бренди глобал миқёсда ўз мавқеини яна бир бор мустаҳкамлади. У жами 25 та давлатда, жумладан, АҚШ, Япония, Саудия Арабистони ва Жанубий Африка каби йирик бозорларда биринчи рақамли бренд бўлиб қолмоқда.
Мутахассислар Toyota’нинг бундай муваффақиятини бир неча омиллар билан изоҳлашади:
Ишончлилик ва чидамлилик: Айниқса, ривожланаётган давлатларда маҳсулотнинг сифати юқори баҳоланади.
Тежамкорлик: Ёнилғи сарфининг камлиги ва техник хизмат кўрсатиш харажатларининг пастлиги харидорларни жалб этади.
Кенг тармоқ: Дунё бўйлаб ёйилган дилерлик марказлари сотиб олиш ва сервис хизматини осонлаштиради.
Европанинг "эски дўстлари" ва маҳаллий ватанпарварлик
Европа қитъасида вазият бироз бошқачароқ. Бу ерда маҳаллий ишлаб чиқарувчилар ҳануз ўз тахтини ҳеч кимга беришмаяпти. Volkswagen бренди Германия, Австрия, Дания, Швейцария ва Буюк Британия каби давлатларда энг севимли марка сифатида қолмоқда.
Шу билан бирга, айрим мамлакатларда миллий ифтихор туйғуси автомобиль танловида ҳам сезилади:
Францияда — Renault;
Италияда — Fiat;
Россияда — Lada;
Чехияда — Škoda етакчиликни қўлдан бермаяпти.
Янги кучлар: Электромобиллар ва миллий рамзлар
Охирги йилларда глобал рақобат орасига янги ва кучли иштирокчилар қўшилди. Масалан, Хитойда электромобилларга бўлган улкан талаб ортидан BYD компанияси ички бозорда пешқадамга айланди. Ҳиндистонда эса Maruti бренди арзон нархи ва ҳамёнбоплиги билан мутлақ етакчи.
Шунингдек, ўз миллий саноатини жадал ривожлантираётган давлатлар ҳам бор:
Вьетнамда VinFast миллий электромобиль рамзига айланган бўлса,
Эронда Iran Khodro,
Нигерияда эса Innoson брендлари маҳаллий бозорни эгаллаб турибди.
Хулоса қилиб айтганда, дунё бозорида глобал гигантлар ҳукмронлик қилаётган бўлса-да, давлат қўллаб-қувватлови ва халқнинг ўз маҳсулотига бўлган ишончи маҳаллий брендларга катта имкониятлар тақдим этмоқда.
Сизнингча, маҳаллий ишлаб чиқарувчилар вақти келиб Toyota ёки Volkswagen каби глобал даражага чиқа оладими?
“Zamin”ни Telegram'да ўқинг!
