Хитойда ҳайдовчисиз юк машиналари йўлга чиқди

Хитойда сунъий интеллект технологиялари асосида ишлайдиган ҳайдовчисиз юк машиналари айрим автомагистралларда юк ташишни бошлади. Янги авлод транспорт воситалари инсон иштирокисиз ҳаракатланиб, логистика соҳасида муҳим янгилик сифатида баҳоланмоқда.

Маълум қилинишича, юк машиналари атроф-муҳитни кузатиш учун юқори аниқликдаги камералар, LiDAR, радарлар, GPS тизими ҳамда юқори аниқликдаги рақамли хариталардан фойдаланади. Бу технологиялар йўлдаги бошқа транспорт воситалари, пиёдалар ва турли тўсиқларни аниқлаб, хавфсиз ҳаракатланиш имконини беради.

Мутахассисларнинг таъкидлашича, ҳайдовчисиз юк ташиш тизими логистика харажатларини сезиларли даражада камайтириши, юкларни тезроқ ва узлуксиз етказиб беришга ёрдам бериши ҳамда транспорт тармоғининг умумий самарадорлигини ошириши кутилмоқда. Шунингдек, бундай технология инсон омили билан боғлиқ айрим хатоларни камайтиришга ҳам хизмат қилиши мумкин.

Ҳозирча ҳайдовчисиз юк машиналари Хитойнинг барча йўлларида эмас. Улар асосан махсус рухсат берилган автомагистраллар ва айрим ҳудудларда синов ҳамда тижорат тартибида ҳаракатланмоқда. Агар лойиҳалар муваффақиятли якунланса, келгусида бундай транспорт воситаларининг фаолияти мамлакатнинг бошқа ҳудудларида ҳам босқичма-босқич кенгайтирилиши режалаштирилмоқда.