21:13 / 04.12.2022

Британияда россиялик олигарх Михаил Фридман ҳибсга олинди

^{Фото: Getty Images}
Буюк Британиянинг миллий жиноят агентлиги (NCA) россиялик олигарх Михаил Фридманни ҳибсга олди. Бу ҳақда Financial Times хабар берди.

Миллиардер пул ювиш, Ички ишлар вазирлигини алдаш ва ёлғон гувоҳлик бериш учун тил бириктириш каби жиноятларда гумон қилиб ушланган. 58 ёшли тадбиркор 1 декабрь, пайшанба куни Лондондаги қароргоҳида клептократияга қарши кураш бўлими ходимлари томонидан ҳибсга олинган. Фридман билан бирга бир неча минг фунт нақд пул солинган сумка билан қароргоҳдан чиқиб кетаётган 35 ёшли эркак ҳам қўлга олинган.

У пул ювиш ва Британия миллий жиноят агентлигига тўсқинлик қилишда гумон қилинмоқда. Шунингдек, яна бир 39 ёшли эркак Лондондаги уйида бир қатор жиноятлар, жумладан, пул ювиш ва фирибгарлик мақсадида тил бириктирганлик учун ҳибсга олинган.

Фридманнинг уйини тинтув қилиш чоғида бир нечта рақамли қурилмалар ва катта миқдордаги нақд пул мусодара қилинган. Таъкидланишича, қўлга олинган учала шахс NCA томонидан сўроқ қилинган ва кейинчалик гаров эвазига қўйиб юборилган.

«2022 йилда ташкил этилган NCA’нинг Клептократияга қарши бўлими олигархлар ва профессионал хизмат кўрсатувчиларнинг, шунингдек, Россия режими билан боғлиқ бўлган шахслар томонидан потенциал жиноий фаолиятни текширишда сезиларли ютуқларга эришди. Биз ушбу таҳдидни бартараф этишда мавжуд куч ва тактикаларни ишга солишда давом этамиз», — дейди NCA бош директори Грем Bigгар.

Агентлик ҳибсга олинганлар исмини очиқламаган, аммо Фридманга яқин манба Россиянинг «ТАCC» агентлигига мазкур маълумотни тасдиқлаб, миллиардер гаров эвазига қўйиб юборилганини айтган.

«Фридман унга нисбатан қўлланилган санкцияларни бузганликда гумонлангани учун қўлга олинди», — дейди «ТАCC» манбаси.

Михаил Фридман Россия Алфа банкининг назорат пакетига эга. У ва унинг бизнес ҳамкорлари Петр Авен, Герман Хан Европа Иттифоқи ва Буюк Британиянинг санкциялар рўйхатига тушган, бироқ ҳозиргача АҚШ санкцияларидан қочиб қутилишга муваффақ бўлган.