Гватемала суди собиқ президентни 16 йилга озодликдан маҳрум қилди

^{Фото: El Pais}
Гватемала суди собиқ президент Отто Перез Moлинa ва вице-президент Роксана Бальдеттини фирибгарлик ва фитнада айблаб, ҳар бирини 16 йилга озодликдан маҳрум қилди. Бу ҳақда Al Jazeera хабар берди.

Судья Ирма Жаннет Валдезнинг сўзларига кўра, Перез Moлинa пулларни ноқонуний ўзлаштириш ва божхона фирибгарлигида айбдор деб топилган. У ҳар бир айблов бўйича саккиз йилга ҳукм қилинган ва Бальдетти ҳам худди шундай жазо олган.

Перез Moлинa ва Бальдетти 2015 йилда истеъфога чиққан ва La Lineа ёки The Line деб номланувчи божхона коррупцияси схемасидан фойдаланишга рухсат берганлик ва ундан фойда кўрганликда айбланиб, ҳибсда бўлган. Ушбу схема корхоналарга пора эвазига импорт божини тўлашдан бўйин товлаш орқали давлатни алдашга қаратилган.

1 миллион долларга яқин пора ва 2 миллион долларга яқин давлат даромади йўқотилган бу ишга 30 га яқин шахс, жумладан, божхона ходимлари ва тадбиркорлар алоқадор бўлган. Айбланувчиларнинг бир қисми оқланган.

2012 йилдан 2015 йилгача давлатни бошқарган Перез Moлинa айбловларни рад этишда давом этмоқда. У яна иккита иш юзасидан тергов остида қолмоқда.

«Бу ёлғон. Ҳеч ким ҳеч қачон ноқонуний буйруқ берганимни айтмаган ва бундай қилмаганман. Улар ҳеч қачон менга пора берилганини айтмаган. Ўзимни ҳафсаласи пир бўлгандек ҳис қиляпман», — деган 72 ёшли собиқ президент.

Гватемала собиқ президенти ҳукм устидан шикоят қилишини қўшимча қилган. Перез Moлинaнинг жиноий жавобгарликка тортилиши Бирлашган Миллатлар Ташкилоти томонидан қўллаб-қувватланадиган коррупцияга қарши миссияси ёрдами билан амалга оширилмоқда. “Замин” янгиликларини “Telegram”да кузатиб боринг