Эрдўған Швецияда Қуръоннинг ёқилишига муносабат билдирди

^{Фото: Anadolu Agency}
Швеция аксилисломий хатти-ҳаракатлари учун Анқарадан НАТОга аъзо бўлиш ҳужжатини ратификация қилиш бўйича ёрдам олмайди. Бу ҳақда Туркия президенти Ражаб Тоййиб Эрдўған Вазирлар Маҳкамаси йиғилишида айтди, деб хабар берди ТАСС.

«Швециядаги бу нопок ҳаракатлар (...) мусулмонларни, шунингдек, барча одамларнинг ҳуқуқ ва эркинликларини ҳақорат қилиш ҳисобланади. Сиз [КИП] террорчиларини қўллаб-қувватлашда давом этяпсиз, шунингдек, НАТОга қўшилиш учун ёрдамни кутяпсиз. Бундай бўлмайди. Швеция энди биздан бу ёрдамни кутмаслиги керак», деди Туркия раҳбари.

Аввалроқ, Даниянинг ультраўнг «Кескин курс» партияси етакчиси Расмус Палудан Туркиянинг Швециядаги элчихонаси олдида Қуръонни ёқиб юборди. У бунга маҳаллий полициядан рухсат олганини айтди. Ўз навбатида, Швеция полицияси бунга изоҳ бераркан, «норозилик намойишини ўтказиш қадрияти ва сўз эркинлиги мамлакат конституцияси томонидан ҳимоя этилишини» таъкидлади.

Бундан ташқари, Швеция суди Курдистон ишчилар партияси (КИП, Туркияда террорчи ташкилот сифатида тан олинган) тарафдорларининг Туркия президенти Ражаб Тоййиб Эрдўған қиёфасидаги қўғирчоқни ёқиб юборилиши билан боғлиқ ҳолатни текширишдан бош тортди.

Шунингдек, Швеция ва Финляндия ҳукумати Туркия томони террорчи деб ҳисоблаган 130 га яқин курдни Анқарага экстрадиция қилишдан бош тортган эди. “Замин” янгиликларини “Telegram”да кузатиб боринг