Россия президенти Владимир Путин туркиялик ҳамкасби Ражаб Тоййиб Эрдўғон билан телефон орқали мулоқотда Каховка ГЭС тўғони портлашига муносабат билдирди. Бу ҳақда “РИА Новости” хабар берди.
Путиннинг таъкидлашича, Киев ҳукумати ўзларининг ғарблик кураторлари таклифи билан “урушни авж олдириш, ҳарбий жиноятлар содир этиш, террорчилик усулларини очиқдан очиқ қўллаш, Россия ҳудудида қўпорувчилик уюштиришга пул тикмоқда”.
“Бунинг ёрқин мисоли Херсон вилоятидаги Каховка ГЭСни йўқ қилиш бўйича ваҳший ҳаракатлар бўлиб, бу кенг кўламли экологик ва гуманитар фалокатга олиб келди”, — деган Россия президенти.
Эрдўғон россиялик ва украиналик экспертлар, БМТ ва халқаро ҳамжамият, жумладан, Анқара иштирокида Каховка ГЭСнинг вайрон бўлишини текшириш бўйича комиссия тузишни таклиф қилган.
Ўз навбатида, Путин билан мулоқотдан олдин Туркия президенти украиналик ҳамкасби Владимир Зеленский билан ҳам суҳбатлашган. Президентлар Каховка ГЭСнинг вайрон бўлишини текшириш бўйича “халқаро комиссия” тузиш ғоясини муҳокама қилган.
Каховка ГЭС портлатилиши
6 июнь куни Херсон вилоятининг Россия томонидан вақтинча босиб олинган қисмида Каховка ГЭСнинг тўғони портлатилди. Сув Днепрнинг қуйи оқимига назоратсиз равишда оқизилган. Украина ва Россия бир-бирини ГЭСни вайрон қилишда айблади. Сув тошқинлари хавфи остида қолган ҳудудлардан аҳоли эвакуация қилинмоқда.
Владимир Зеленскийнинг сўзларига кўра, станциянинг вайрон бўлиши оқибатида 80 га яқин шаҳар ва қишлоқлар “сув остида” қолган, уларда Россиянинг кенг кўламли босқинидан олдин камида 100 минг киши яшаган. Қрим ва Запорожье атом электр станциясига сув танқислиги таҳдид солаётгани айтилмоқда.
