Туркия полицияси ИШИД террорчилик ташкилотига алоқадор 3 нафар шахсни қўлга олди

^{Фото: Anadolu}
12 март куни Туркия хавфсизлик кучлари мамлакат марказий вилоятларида рейд ўтказиб, ИШИД террорчилигига тайёргарлик кўришда гумонланган уч нафар шахсни қўлга олди. Бу ҳақда Anadolu нашри хабар берди.

Маҳаллий губернаторлик баёнотида айтилишича, гумондорлар Чорум вилоятида ИШИД террорчилик гуруҳига қарши операция доирасида қўлга олинган. Ҳибсга олинганлардан икки нафари Интерпол томонидан қизил даражадаги билдиришнома билан қидирувга берилгани аниқланган.

ИШИД ҳаракати 2013 йилда Туркияда террорчи ташкилот деб тан олинган. Ушбу ташкилот билан ҳар қандай алоқа учун Туркияда қамоқ жазоси жорий этилган.

2013 йилдан бери Туркияда ИШИД террорчи гуруҳи томонидан бир неча бор қўпорувчилик ҳаракатлари содир этилган. 10 та худкушлик ҳужуми ва 7 та бомбали терактда жами 300 дан ортиқ турк фуқароси ҳалок бўлган. Юзлаб одамлар яраланган.

Сўнгги террористик таҳдидларга қарши туриш учун Туркия мамлакат ичкарисида ва хорижда аксилтеррор амалиётларини бошлагани хабар қилинган. “Замин” янгиликларини “Telegram”да кузатиб боринг