Венгрияда йирик можаро: Орбан коррупцияда, мухолифатчи оилавий зўравонликда айбланмоқда

^{Петер Мадяр. Фото: hotnews.ro}
26 март сешанба куни венгриялик мухолифатчи Петер Мадяр собиқ адлия вазири Юдит Варга овози туширилган ёзувни очиқлади, унда мулозим мамлакатдаги коррупцияни яшириш учун тил бириктирганини тасдиқлаган. Аудиофайл Будапешт прокуратурасига топширилган.

Аудиоёзувда қайд этилишича, ҳукумат аъзолари прокурорлар орқали суд баённомаларидан коррупцион бизнес операцияларда ўзларининг иштироки тўғрисидаги далилларни йўқ қилишган, деб ёзади Associated Press.

Бироқ, собиқ адлия вазири Юдит Варга коррупцияни яшириш фактини рад этмоқда. У Facebook ижтимоий тармоғида бу баёнотни ўша пайтда турмуш ўртоғи бўлган Петер Мадяр талабига кўра айтганини таъкидлаган. У собиқ эрини оилавий зўравонлик ва манипуляция қилишда айблаган.

«Мен тезроқ ундан қутилиш учун у эшитишни истаган нарсани сўзлашга мажбур бўлганман. Бундай вазиятда ҳар қандай қўрқув остида инсон ўзи истамаган нарсаларни гапиришга мажбур бўлади», — деб ёзган Варга.

^{Юдит Варга. Фото: mandiner.hu}
Кейинроқ Петер Мадяр ўзининг собиқ рафиқасининг айбловларини рад этган.

Қайд этиб ўтиш керакки, мухолифатчи феврал ойида YouTube’даги Partizan каналига интервю берганидан сўнг машҳур бўлиб кетган. Ўшанда у Орбан ҳукумати мухолифатдагиларга нисбатан информацион туҳмат кампанияларидан фойдаланаётганини гапириб берган эди. Яқинда Петер Мадяр амалдаги ҳукуматга рақобатчи бўлувчи ўз партиясини тузишни эълон қилди.

Юдит Варга Венгрия адлия вазири бўлиб ишлаган, бироқ давлат меҳрибонлик уйида болалар устидан зўаровонликни яширган инсоннинг афв қилиниши ортидан истеъфога чиқишга мажбур бўлган эди.

^{Каталин Новак. Фото: magyarnemzet.hu}
Бу инсонни амнистия қилишни собиқ президент Каталин Новак ҳам имзолаган. У ҳам истеъфога чиқишга мажбур бўлган.

Янгиликлар