Байден Исроил бош вазири урушни чўзаётгани сабабини айтди

^{Фото: Reuters}
АҚШ президенти Жо Байден Исроил бош вазири Биньямин Нетаньяху ўзининг сиёсий мақсадлари учун Ғазо секторидаги урушни узайтираётганини айтди. Бу ҳақда Reuters хабар берди.

Байденнинг сўзларига кўра, Нетаньяху сиёсий жиҳатдан ўзини қутқариш учун урушни узайтираётгани бўйича ишончли асослар мавжуд. АҚШ президенти Исроил кучларининг Ғазода ҳарбий жиноятлар содир этгани ёки йўқлиги “ноаниқ” эканини айтди. У яҳудий давлати бу бўйича қатор текширувлар олиб бораётганини таъкидлади.

Сиёсатчи Исроил тинч аҳолини очликдан ўлдиришни уруш усули сифатида фойдаланаётгани ҳақидаги даъволарни рад этди, аммо “улар номақбул фаолият билан шуғуллангани”ни қўшимча қилди.

"Байден Исроилни АҚШ каби 2001 йил 11 сентябрдаги терактлардан сўнг “туганмас урушлар”га олиб келган хатога йўл қўймаслик ҳақида огоҳлантирган", — дейилади хабарда.

Исроилнинг Ғазо секторига сўнгги ҳужуми

Исроил армияси 6 июнь куни Ғазодаги Нусейрат қочқинлар лагерига берган зарбаси оқибатида камида 32 киши ҳалок бўлди. Исроил қирувчи самолётлари билан фаластинликлар бошпана сифатида фойдаланган БМТнинг фаластинликларга ёрдам кўрсатиш агентлиги (UNRWA) мактабини нишонга олганини тасдиқлаган. Яҳудий давлати ҲАМАС жангчилари мазкур мактабдан бошпана сифатида фойдаланганини даъво қилган. Ғазо ҳукумати Исроил ҳужумини “геноцид ва этник тозалаш”нинг “аниқ далили” деб таърифлаган.

Янгиликлар