Трампни ўлдиришга уринган Мэттю Крукс ҳақида нималар маълум?

^{Фото: Michael M. Santiago / Getty Images}
АҚШ собиқ президенти Доналд Трамп отилганидан кўп ўтмай Федерал суриштирув бюроси бу ишни 20 ёшли Томас Мэттю Крукс қилганини маълум қилди. Пенсилваниядаги Бетел-Парк шаҳридан бўлган бу америкалик ҳақида кўп нарса маълум эмас. The New York Times'нинг ёзишича, қотил Ar-15 яримавтоматик милтиғи билан қуролланган. У 120 метрдан туриб Трампни нишонга олган. У саккизта ўқ отишга улгурган, улардан бири Трампнинг қулоғини ялаб ўтган, бошқаси митинга келган одамлардан бирини ўлдирган, яна бири бошқа бир томошабинни оғир яралаган.

Митингда қатнашган Трамп тарафдорларидан бири яқин атрофдаги бино томига қуролланган одам чиққанини кўргач, бу ҳақда полицияга хабар берган, аммо улар ҳеч қандай реакция билдирмаган. Унинг айтишича, қуролланган жиноятчини бошқа одамлар ҳам кўриб, бу ҳақда хабар беришган. Қизиғи, Трамп сўзга чиққан минбар ёнида иккита мерган одамларга ва катта эҳтимол билан, қотил жойлашган томонга қараб турган. Митингдагилар айнан шу мерганларни видеога олаётганда отишма бошланиб кетган.

NYT фотографи Даг Миллс Трамп томон отилган ўқ йўналишини суратга олишга муваффақ бўлди. Федерал суриштирув бюроси истеъфодаги агенти Мафкл Ҳарриган бу чиндан ўқ изи эканини тасдиқлаган.

Пенсилвания штати суд идоралари маълумотига кўра, Крукс ҳеч қачон жиноий ёки маъмурий жавобгарликка тортилмаган. Америка сайловчилари базасида у республикачилар вакили сифатида рўйхатга олинган. Жорий йил Крукс илк марта президентлик сайловларида қатнашиши мумкин бўлган. У 2021 йилда демократлар платформасидаги ActBlue дастурини қўллаш учун 15 доллар хайрия қилган.

Қотилнинг ёнида шахсини тасдиқловчи гувоҳномаси бўлмаган. Шу сабаб унинг ким эканини бошқа воситалар, хусусан, ДНК намунаси орқали аниқлашган.

Крукс 2022 йил Бетел-Паркдаги 1400 нафар атрофида ўқувчи ўқийдиган ўрта мактабни тамомлаган. У дипломдан ташқари 500 доллар миқдорида «юлдузли мукофот» ҳам олган. Бу математика ва табиий фанларни ривожлантириш дастури доирасидаги мукофот бўлган. Битирув кечасида мактабдошлари уни гулдурос қарсаклар билан кутиб олишгани айтилади.

Суиқасддан кейин гўёки Крукс республикачилар ва Трампни ёмон кўришини айтган видео кенг тарқалди. Аммо маълум бўлишича, бу фейк видео бўлиб, уни ташқи кўриниши Круксга ўхшаб кетадиган пранкер эълон қилгани маълум бўлди. Кўп ўтмай jewgazing никли бу пранкер видеони ўчириб ташлаган.

Айни дамда Крукс яшайдиган уй полиция томонидан ўраб олинган. АҚШ фуқароси авиацияси хавфсизлик нуқтайи назаридан Батлер шаҳри устидан парвозларни чеклаган. Крукснинг отаси CNN билан суҳбатда нима бўлганини англашга ҳаракат қилаётгани, полиция билан суҳбатдан аввал нимадир дея олмаслигини билдирган. Айни дамда унинг уйида тинтув олиб борилмоқда. «Замин» янгиликларини «Вконтакти»да кузатиб боринг