Анант Амбани ва Радҳика Мерчантнинг ғайриоддий севги ҳикояси

2024 йилнинг 12 июль куни Ҳиндистонда “аср тўйи” бўлиб ўтди — Анант Амбани ва Радҳика Мерчантнинг уч кунлик катта тўй маросими катта шов-шувга сабаб бўлди.

Анант Амбани Ҳиндистон ва бутун Осиёнинг энг бой одами — Мукеш Амбанининг кенжа ўғли бўлиб, отаси 2023 йилда Forbes рейтингида тўққизинчи ўринни эгаллаган. Бугунги кунда унинг бойлиги 113,8 миллиард долларга баҳоланмоқда. Амбани даромади энг йирик нефтни қайта ишлаш комплекси, медиа гуруҳи ва синтетик тўқимачилик ишлаб чиқаришни ўз ичига олган конгломератдан келади. Оилавий бизнесга Мукешнинг отаси асос солган, аммо меросхўр бизнесни сезиларли даражада оширишга муваффақ бўлди.

Келин ҳам бу оилага мос — Радҳика Мерчант 2002 йилда Encore Healthcare фармацевтика компаниясига асос солган Вирен ва Шейла Мерчант оиласида туғилган. Турмуш ўртоғи каби Радҳика ҳам бадавлат оилада ўсган. Айтганча, Анантнинг ота-онаси болаликдан пулга нисбатан оқилона муносабатни шакллантиришга ҳаракат қилган. Шундай қилиб, мактабда у бир ҳафта учун атиги 5 рупий чўнтак пули олган — бошқа болалар “Сен Амбанимисан ёки тиланчимисан?” деб уни масхара ҳам қилишган.

Анант ва Радҳика бир хил ижтимоий доиралардан бўлгани ва иккаласи ҳам Мумбайда ўсгани учун улар болаликдан дўст бўлган. Ўқишни тугатгандан сўнг, иккаласи ҳам АҚШга ўқишга кетишади, аммо турли университетларга ўқишга киришади. Анант Род-Айленддаги Браун университетига, Радҳика эса Нью Йорк университетида сиёсатшуносликка таҳсил олган.

Кейинчалик ҳам ёшлар бир-бири билан гаплашиб туришади, эҳтимол, ўша вақтда улар ўртасида ишқий муносабатлар пайдо бўлгандир. 2018 йилда улар диплом олганларидан бир йил ўтгач, интернетда жуфтликнинг биргаликдаги фотосурати пайдо бўлди, бу болаликдаги дўстлик севгига айланганига аниқ ишора эди.

Суратда Радҳика ва Анант бир хил рангда кийиниб олган. Мерчант Амбаниларнинг оилавий тантаналарида Анант билан қўл ушлашиб, қатнаша бошлаганида, улар ҳақида жиддий гапира бошлашади. 2022 йил декабрь ойида севишганлар унаштирилади.

Ўшанда Анант қаллиғига таъсирли нутқ сўзлайди.

“Менга 100 фоиз омад кулиб боқди. Бунга ҳеч қандай шубҳам йўқ. Ҳар куни мен уни янада кўпроқ севаман. Поччам айтганидек, опамни кўрганида юрагида вулқонлар, фавворалар уйғонган экан. Лекин мен Радҳикани кўрганимда юрагимда зилзилалар, цунамилар содир бўлади, деган бўлардим”, дейди шоирона тарзда куёв.

Айтганча, жуфтликнинг муносабатлари коронавирус пандемияси пайтида биргаликда ўзини-ўзи изоляция қилиш орқали синовдан ўтган. Ўшанда улар Жамнагарда қолиб кетишади ва бир неча ой оилаларини кўра олмайдилар.

“Бу осон бўлмаса-да, биз ҳаётнинг кичик қувончларини қадрлашни ўргандик”, деб тан олади Радҳика.

Муносабатларнинг бошида Анант севгилисига севги мактубларини ёзган ва уларни эҳтиёткорлик билан асраб қўйган. Иккаласи ҳам 22 ёш бўлганида ёзилган бир мактубнинг сатрлари тўйдан олдинги базмларда келиннинг либосларидан бирига нақш қилиб туширилди.

“У туғилган кунимда у учун қанчалик аҳамиятга эга эканлигим ҳақида узун мактуб ёзганди. Мен уни авлодларимиз учун сақлаб қўйгим ​​келди – мен буни фарзандларим ва невараларимга кўрсатишни ва “бизнинг севгимиз шундай бўлган” дейишни хоҳлайман, дейди Мерчант интервьюсида.
Бироқ янги келин-куёв фарзанд кўриш режалари билан ўртоқлашмаган: иккаласи ҳам оилавий бизнесдаги карьералари билан банд. Радҳика фармацевтика компаниясининг директорлар кенгашида, худди Анант отасининг компаниясида юқори лавозимни эгаллагани каби мавқега эга.

Анант Амбани кўп йиллар давомида ортиқча вазн билан курашиб келади. Бирданига вазн йўқотишдан сўнг, Анант 2020 йилда яна семиришни бошлади. Бу кураш энг бой одамнинг меросхўри болалигидан азоб чекадиган сурункали астма билан янада оғирлашган.

Ҳозирда Анант ва Радҳика бўлажак фарзандлари ўрнига ёввойи ҳайвонларга ғамхўрлик қилмоқдалар – иккаласи ҳам бутун Ҳиндистон бўйлаб хайрия ишлари ва филларни қутқариш билан шуғулланади. “Замин” янгиликларини “Twitter”да кузатиб боринг