Эрон валютаси рекорд даражада қадрсизланди

^{Фото: Reuters}
Эрон риёли курси АҚШ долларига нисбатан 2 фоизга пасайиб, янги тарихий минимал даражага етди: 1 доллар учун 756 минг риёл. Бу ҳақда Reuters хабар берди.

Эрон валютаси ноябр ойида, мамлакатга «максимал босим» ўтказишга ваъда берган Доналд Трампнинг АҚШ президенти сайловида ғалаба қозонганидан сўнг фаол равишда арзонлаша бошлади.

Ўтган ҳафтада Трамп маслаҳатчилари унга Исроил Ҳарбий ҳаво кучлари томонидан ядровий иншоотларга зарбалар беришни назарда тутувчи Эронни тийиб туриш режасини таклиф қилишган эди. Ушбу режанинг бир қисми сифатида АҚШ Исроилга Эрон ядровий иншоотларини ишдан чиқарадиган «замонавий қуролларни» топшириши керак.

Бундан ташқари, ноябр ойи охирида БМТ Атом энергияси бўйича халқаро агентлиги (АЭХА) Эронни мамлакат ядровий дастури бўйича мулоқот ўрнатишга чақирувчи резолюцияни қабул қилди. Акс ҳолда, Эронга нисбатан янги халқаро санкциялар қўлланилиши мумкин.

Эронга нисбатан бундай риторика сармоядорларнинг валюта бозоридаги хавотирини сезиларли даражада оширгани таъкидланмоқда, бу эса Эрон валютасининг рекорд даражада қадрсизланишига олиб келган.

Мамлакат фуқаролари ҳам риёлга ишончсизлик билдирмоқда – улар ўз маблағларини жорий йилда Эронда 30 фоиздан ошиб кетган инфляциядан ҳимоя қилиш мақсадида доллар ва бошқа хорижий валюталарни, шунингдек, олтин ва криптовалюта сотиб олишга сарфламоқда. «Замин» янгиликларини «Вконтакти»да кузатиб боринг