06:25 / 12.01.2025

Toyota компанияси Фужи тоғи этакларида «ақлли шаҳар» қурилишини якунлади

^{Фото: Woven Toyota}
Япониянинг Toyota компанияси ўзининг Woven City номли «ақлли шаҳри» қурилиши якунланганини эълон қилди. Ушбу шаҳар автоном электромобиллар, роботлар, озиқ-овқат етказиб бериш учун мўлжалланган дронлар ва, албатта, ўз эгаларининг барча истакларини биладиган сунъий интеллектга эга «ақлли» уйлардан иборат.

Woven City’ни қуриш ишлари 2020 йилда бошланган. Бугунги кунга келиб, Фужи (Фудзияма) тоғи яқинидаги ушбу мажмуага 360 киши жойлаштирилган. 2025 йилнинг кузида эса у биринчи юз кишини — компания ходимлари ҳамда уларнинг яқин қариндошларини қабул қилади. Аммо бу барчаси эмас: шаҳар тўлиқ очилганидан кейин у ерда умумий ҳисобда 2 мингга яқин инсон яшаши мумкин бўлади.

^{Фото: Woven Toyota}

^{Фото: Woven Toyota}
«Toyota’нинг кучли томонларини бошқа соҳалар вакиллари билан бирлаштириб, биз мустақил эришиб бўлмайдиган янги қадриятлар, янги маҳсулот ва хизматлар ярата олишимизга ишонамиз», — дейди Toyota Motor Corp раиси Акио Тойода.

Woven City — сунъий интеллект ёрдамида ишлайдиган «ақлли» уйлардан тортиб, транспортнинг муайян турлари учун мўлжалланган кўчаларгача бўлган замонавий технологияларни кундалик ҳаётга олиб киришга қаратилган лойиҳа. Шу билан бирга, мажмуа экология ҳақида ҳам қайғуради — у ҳозирда энергия самарадорлик, сув таъминоти, экологик тоза маҳсулотлар, дизайндаги инновациялар бўйича дунёдаги энг юқори стандарт бўлган LEED’нинг платина сертификатини олган.

^{Фото: Woven Toyota}

^{Фото: Woven Toyota}
Woven City Toyota’нинг Фудзияма этакларида жойлашган собиқ заводи ерларида қурилган. Олдин у ердаги 700 минг метр квадрат жойда 7 минг нафар ходим ишлаган. 53 йиллик фаолиятидан сўнг корхона 2020 йил охирида ёпилганди.

Toyota Компания Фужи тоғи Ақлли шаҳар