Фото: Bernd Elmenthaler/IMAGO
Германия канцлери Олаф Шолц АҚШ президенти Доналд Трампнинг Украина етакчиси Володимир Зеленскийни диктатор деган даъвосини кескин рад этди. 19 феврал, чоршанба куни Шолц ҳафталик Der Spiegel нашрига берган интервюсида: "Президент Зеленскийнинг демократик қонунийлиги йўқ, дейиш шунчаки нотўғри ва хавфли", деди.
«Ҳақиқат шуки, Володимир Зеленский Украина давлатининг қонуний сайланган раҳбари ҳисобланади. Уруш шароитида тўғри сайловларни ўтказишнинг иложи йўқлиги Украина конституцияси ва сайлов қонунлари қоидаларига тўғри келади. Ва бунинг аксини даъво қилишга ҳеч кимнинг ҳаққи йўқ», — дея таъкидлади Германия ҳукумати раҳбари.
У Украинага қарши урушни айнан Владимир Путин бошчилигидаги Россия бошлаганини эслади. «Украина қарийб уч йилдан бери Россиянинг шафқатсиз тажовузидан ўзини ҳимоя қилмоқда. Ҳар куни», — дейди Шолц.
Трампнинг Зеленский ҳақидаги баёнотлари Германия ташқи ишлар вазири Анналена Бербок ва федерал иқтисодиёт вазирлиги раҳбари, вице-канцлер Роберт Хабек томонидан ҳам танқид қилинди. «Агар сиз ижтимоий тармоқларда шошқалоқ постлар ёзмасангиз, балки реал дунёга диққат билан қарасангиз, Европада ким диктатура остида яшашга мажбур бўлганлиги аён бўлади: булар Россиядаги одамлар, Беларусдаги одамлар», деди Бербок ZDF оммавий-ҳуқуқий телеканалига берган интервюсида. «Украиналиклар ҳар куни ўзларининг эркин демократияси учун курашадилар ва биз, европаликлар, демократик давлатларимизни биргаликда мустаҳкамлаш учун уларни Европа Иттифоқига борадиган йўлда қўллаб-қувватлаймиз», — дея қўшимча қилди Германия ТИВ раҳбари.
«АҚШ президентининг баёноти ҳайратга солади. Бу воқеликни мисли кўрилмаган бузиб кўрсатиш ва ўта хавфли риторика. Ҳақиқат шуки, Путин демократик Украинага ҳужум қилди», деб ёзди Роберт Хебек ўз навбатида X ижтимоий тармоғида.
Трампга кўра, Зеленскийнинг Украинадаги рейтинги атиги 4 фоиз
Бир кун аввал Доналд Трамп Зеленскийни Украинада президентлик сайловларини ўтказишга чақириб, Украина етакчисининг рейтинги тўрт фоизга тушиб кетганини даъво қилган эди. Зеленский бунга жавобан Трампнинг баёнотини «Россиядан келган» дезинформация деб атади. Украина президенти матбуот анжумани чоғида Киев халқаро социология институти ўтказган сўровга таяниб, 2025 йил феврал ҳолатига кўра, фуқароларнинг 57 фоизи унга ишонишини таъкидлади.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
